काठमाडौं। गत भदौमा भएको जेनजी आन्दोलनमा राज्यपक्षबाट दमन गरेको अभियोगमा ज्यान मुद्दामा अनुसन्धानका लागि प्रहरीले काठमाडौंका तत्कालीन प्रमुख जिल्ला अधिकारी (सिडिओ) छवि रिजाललाई मंगलबार बिहान पक्राउ गरेको छ।
काठमाडौं अपराध अनुसन्धान कार्यालयको टोलीले उनलाई सुविधानगरबाट पक्राउ गरेको हो। जेनजी आन्दोलनको क्रममा ‘हेलचेक्र्याइँ गरी ज्यान मारेको’ अभियोगमा उनलाई प्रहरीले पक्राउ गरेको हो।
प्रहरीले यसअघि गत शनिबार तत्कालीन प्रधानमन्त्री केपी शर्मा ओली र गृहमन्त्री रमेश लेखकलाई पक्राउ गरेको थियो, उनीहरुविरुद्ध अनुसन्धान जारी छ।
जेनजी आन्दोलन जाँचबुझ गर्न गठित पूर्वन्यायाधीश गौरीबहादुर कार्की आयोगले आन्दोलनमा नागरिकको ज्यान जानुमा ओली? लेखक, रिजालसहितलाई पनि दोषी किटान गर्दै मुद्दा चलाउन सिफारिस गरेको थियो।
तत्कालीन गृहसचिव गोकर्णमणि दुवाडीलाई पनि तत्काल पक्राउ गरेर अनुसन्धान गर्न आयोगले सिफारिस गरेको छ। तर, दुवाडी भने पक्राउ परेका छैनन्।
