काठमाडौं । सरकारले मधेश प्रदेशका आठ जिल्लालाई आगामी तीन महिनाका लागि विपत् संकटग्रस्त क्षेत्र घोषणा गरेको छ। बुधबार मन्त्रिपरिषद् बैठकले यो निर्णय गरेको हो।
खानेपानी मन्त्री प्रदीप यादवका अनुसार लगातारको अनावृष्टिका कारण खेतबारी सुक्खा हुन थालेका छन् भने सिँचाइ प्रणालीसमेत प्रभावित भएको छ। भूमिगत पानीको स्रोत सुक्दै जाँदा सर्वसाधारणलाई खानेपानीसमेत अभाव हुन थालेपछि सरकारले आपत्कालीन अवस्था घोषणा गर्नुपरेको बताइएको छ।
सरकारले संकटग्रस्त क्षेत्र घोषणासँगै सम्बन्धित जिल्लाहरूमा राहत, उद्धार र पुनःस्थापना कार्य प्रभावकारी बनाउन संघ, प्रदेश र स्थानीय तहबीच समन्वय गर्नुपर्ने आवश्यकता रहेको उल्लेख गरेको छ।
प्रभावित जिल्लाहरूको नाम र त्यसका लागि कार्यान्वयनमा ल्याइने विस्तृत योजना छिट्टै सार्वजनिक गरिने मन्त्रालय स्रोतले जनाएको छ।
