काठमाडौं । नवनियुक्त शिक्षा विज्ञान तथा प्रविधि मन्त्री विद्या भट्टराईले पदभार ग्रहण गरेकी छन्। सोमबार शपथग्रहणलगत्तै शिक्षा मन्त्रालय पुगेर पदभार ग्रहण गरेकी हुन्। नेकपा एमालेकी उनी पहिलोपटक शिक्षामन्त्री भएकी हुन्।
२०२९ सालमा जन्मेकी भट्टराई २०४६ सालबाट विद्यार्थी आन्दोलनमा सक्रिय भएकी थिइन्। पद्मकन्या क्याम्पसमा अध्ययन गर्दा विद्यार्थी आन्दोलनमा होमिइन् उनी। २०५० सालमा अनेरास्ववियु महिला विभाग प्रमुख भएर काम गरिन्।
०५५ मा अनेरास्ववियुको केन्द्रीय सचिवको जिम्मेवारी लिएर काम गरेकी थिइन्। उनी विद्यार्थी आन्दोलनमा लाग्दा लाग्दै प्राध्यापक क्षेत्रमा पनि प्रवेश गरिन्।
०७२ सालदेखि रत्नराज्य क्याम्पसमा स्थायी रूपमा उपप्राध्यापकको जागिर सुरु गरेकी थिइन्। २०७५ फागुनमा हेलिकोप्टर दुर्घटनामा परी उनका श्रीमान् पर्यटनमन्त्री रवीन्द्रप्रसाद अधिकारीको असामयिक निधनले रिक्त भएको निर्वाचन क्षेत्र कास्की –२ को उपनिर्वाचनमा उम्मेदवार भएर उनी विजयी भइन्।
त्यसपछि उनी लगातार राजनीतिमा सक्रिय हुँदै पुनः सांसद जितेर आएकी हुन्। उनी शिक्षा, स्वास्थ्य तथा सूचना प्रविधि समितिको सदस्यसमेत हुन्।
