काठमाडौं । नक्कली भुटानी शरणार्थी बनाएर अमेरिका पठाउने योजनामा संलग्न ३१ जनाविरुद्ध दायर मुद्दाको अन्तिम सुनुवाइ आज (बुधबार)देखि सुरु हुँदैछ। जिल्ला अदालत काठमाडौंमा दुई वर्षदेखि विचाराधीन यो मुद्दा अब अन्तिम टुंगोमा पुग्न लागेको छ।
साक्षी बयान र बकपत्रसम्बन्धी प्रक्रिया सकिएपछि अदालतले आजदेखि साप्ताहिक पेशी सूचीमा राख्दै अन्तिम बहस सुरु गर्ने तयारी गरेको छ। यो मुद्दामा एमाले नेता एवं प्रतिनिधिसभाका निलम्बित सदस्य टोपबहादुर रायमाझी, कांग्रेस नेता एवं पूर्वगृहमन्त्री बालकृष्ण खाँण लगायतका उच्चस्तरीय राजनीतिक र सरकारी व्यक्तिहरू संलग्न छन्। रायमाझी दुई वर्षदेखि पुर्पक्षका लागि थुनामा छन् भने खाँण धरौटीमा छुटेका छन्।
जिल्ला सरकारी वकिल कार्यालय काठमाडौंले २०८० साल जेठ १० गते ठगी, किर्ते, संगठित अपराध र राज्यविरुद्धको अपराधको अभियोगसहित ३० जनाविरुद्ध मुद्दा दायर गरेको थियो। त्यसयता पूरक मुद्दासहित कुल ३१ जनालाई प्रतिवादी बनाइएको छ।
जिल्ला अदालतका तत्कालीन न्यायाधीश प्रेमप्रसाद न्यौपानेको इजलासले पक्राउ परेकालाई प्रमाणका आधारमा थुनामा राखेर मुद्दाको पुर्पक्ष गर्ने आदेश दिइसकेको छ। केही अभियुक्त उच्च अदालतबाट धरौटीमा छुटेका थिए भने पूर्वमन्त्री रायमाझीसहित केही अझै थुनामै छन्।
यस प्रकरणमा २०८२ साल वैशाखयता मात्रै १० पटक साप्ताहिक र १६ पटक पूरक पेशी भइसकेको छ। त्यसैगरी, प्रतिवादी सूचीमा तत्कालीन गृहसचिव टेकनारायण पाण्डे, पूर्व सांसद आङटावा शेर्पा, पूर्व गृहमन्त्री रामबहादुर थापाका सुरक्षा सल्लाहकार इन्द्रजित राई लगायतका उच्च अधिकारीहरू रहेका छन्।
शरणार्थी प्रकरणका बिचौलियाहरूमा केशव दुलाल, दीपा हुमागाईं, हरिभक्त महर्जन र उनकी पत्नी लक्ष्मी महर्जन, सानु भण्डारी, सागर राई, आशिष र सुनिल बुढाथोकी, रामशरण केसी, सन्देश शर्मा, अशोक पोखरेल, गोविन्दकुमार चौधरी, धिरेन राई, टंककुमार गुरुङ, मोहनराज राई, निरञ्जनकुमार खरेल, केशव तुलाधर, राजेश अर्याल, विनीता सावदेन लिम्बु, बेचन झा र भुटानी शरणार्थी नेता टेकनाथ रिजाल समेत रहेका छन्।
अदालतले आजदेखि सुरु हुने अन्तिम बहसपछि लामो समयदेखि चर्चामा रहेको नक्कली भुटानी शरणार्थी प्रकरणको निष्कर्ष निकाल्ने अपेक्षा गरिएको छ।
