काठमाडौं । जल तथा मौसम विज्ञान विभागअन्तर्गतको बाढी पूर्वानुमान महाशाखाले आज ४० जिल्लामा बाढीको जोखिम रहेको जनाउँदै सतर्कता अपनाउन आग्रह गरेको छ। महाशाखाले काठमाण्डौ उपत्यकासहितका जिल्लामा एल्लो अलर्ट (Yellow Alert) जारी गर्दै साना नदीहरूमा आकस्मिक बाढी आउन सक्ने चेतावनी दिएको हो।
अत्यधिक जोखिम भएका जिल्ला:
सोलुखुम्बु, रामेछाप, ओखलढुङ्गा, संखुवासभा, दोलखा, सिन्धुपाल्चोक, रसुवा, धादिङ, नुवाकोट, डोल्पा, जाजरकोट, रुकुम पश्चिम, बझाङ, डोटी र आसपासका क्षेत्रमा बहने साना नदीहरूको बहाव उल्लेख्य रूपमा बढ्ने सम्भावना उच्च रहेको महाशाखाले जनाएको छ। यस क्षेत्रमा आकस्मिक बाढीको जोखिम उच्च रहेको छ।
मध्यम जोखिम भएका जिल्ला:
इलाम, झापा, खोटाङ, भोजपुर, काठमाडौं, ललितपुर, भक्तपुर, काभ्रेपलान्चोक, चितवन, सिन्धुली, उदयपुर, गोरखा, लमजुङ, तनहुँ, कास्की, स्याङ्जा, बागलुङ, पर्वत, नवलपरासी पूर्व, नवलपरासी पश्चिम, रुकुम पूर्व, सल्यान, सुर्खेत, दैलेख, अछाम, कैलाली लगायतका जिल्लामा पनि साना नदीहरूमा मध्यम जोखिम रहेको उल्लेख गरिएको छ।
२१ ठूला नदीको जलस्तर पनि बढ्ने
महाशाखाका अनुसार आज २१ ठूला नदीहरूमा पानीको बहाव उल्लेख्य रूपमा बढ्ने भएकाले ती नदी तटीय क्षेत्रमा बसोबास गर्ने जनतालाई सतर्क रहन अनुरोध गरिएको छ।
सावधानी अपनाउन आग्रह
बाढी पूर्वानुमान महाशाखाले बाढीको सम्भावना रहेका क्षेत्रका नागरिकलाई नदी आसपास जानबाट जोगिन, उच्च स्थानमा सर्न, स्थानीय प्रशासन वा सुरक्षाकर्मीको निर्देशन पालना गर्न र आकस्मिक सूचना सुन्न नियमित रूपमा मौसमसम्बन्धी जानकारी हेर्न सुझाव दिएको छ।
