काठमाडौं । औषधी व्यवस्था विभागले बजारमा आएको लेभोफ्लक्स ५०० ट्याबलेट फिर्ता मागेको छ। राष्ट्रिय औषधी प्रयोगशालामा गरिएको परीक्षणका क्रममा उक्त औषधी गुणस्तरहीन रहेको पुष्टि भएपछि विभागले तुरुन्तै बजारबाट फिर्ता पठाउन निर्देशन दिएको हो।
विभागका अनुसार फिर्ता मागिएको औषधी बारामा आधारित म्याग्नेस फर्मा कम्पनीद्वारा उत्पादन गरिएको बीबी २४००१ ब्याचको हो। गुणस्तर परीक्षणपछि औषधी मापदण्डअनुसार नभएको पाइएपछि बजारबाट फिर्ता लिनुपर्ने अवस्था आएको विभागले जनाएको छ।
लेभोफ्लक्स ५०० तेस्रो पुस्ताको एन्टिबायोटिक औषधी हो, जुन ब्रोंकाइटिस, निमोनिया, छालाको संक्रमण तथा मुत्रनलीको संक्रमणजस्ता गम्भीर ब्याक्टेरियल संक्रमणको उपचारमा प्रयोग हुँदै आएको छ।
विभागका अनुसार उक्त औषधीको नमुना २०२५ फेब्रुअरीमा संकलन गरिएको भए पनि गुणस्तरहीन भएको पुष्टि हुन करिब एक वर्ष लागेको हो। २०२६ जनवरीमा गुणस्तरसम्बन्धी जानकारी प्राप्त भएपछि मात्र औषधी फिर्ता लिन निर्देशन दिइएको विभागले स्पष्ट पारेको छ। यसबीच बजारमा धेरैजसो औषधी बिक्री वा प्रयोग भइसकेको हुन सक्ने अनुमान गरिएको छ।
जनशक्ति अभावका कारण परीक्षण तथा प्रक्रिया ढिला भएको विभागको भनाइ छ। हाल देशभरका करिब २ हजार ५ सय फार्मेसीमा औषधी निरीक्षकमार्फत निरीक्षण गर्दै बजारमा बाँकी रहेको औषधीको विवरण सङ्कलन भइरहेको विभागले जनाएको छ।
विभागले सम्बन्धित कम्पनीलाई गुणस्तरीय औषधी उत्पादन सुनिश्चित गर्न र फिर्ता प्रक्रिया छिटो र प्रभावकारी रूपमा पूरा गर्न निर्देशन समेत दिएको छ।
