काठमाडौं । सरकारले हालसम्म २ हजार ४३१ थान सवारी चालक अनुमतिपत्र (लाइसेन्स) छापेको छ। यातायात व्यवस्था विभागले विभिन्न चरणमा छापिएका लाइसेन्स सार्वजनिक गरेको हो।
जेनजी आन्दोलनका क्रममा भएको आगजनीका कारण विभागको अनलाइन प्रणालीमा प्राविधिक समस्या आएपछि विभागले ‘हेलो यातायात व्यवस्था विभाग’ नामक फेसबुक पेजमार्फत लाइसेन्ससम्बन्धी सूचना सार्वजनिक गर्दै आएको छ।
पहिलो, दोस्रो, तेस्रो र चौथो चरणमार्फत सार्वजनिक गरिएका लाइसेन्स प्राप्त गर्न सेवाग्राहीले सक्कल राजस्व तिरेको रसिदसहित विभागमा उपस्थित हुन आग्रह गरिएको छ। लाइसेन्स नवीकरण वा नयाँ वर्ग थप्नेका लागि पुरानो लाइसेन्स अनिवार्य ल्याउन पर्ने विभागले जनाएको छ।
यसअघि विभागले अनलाइन फारम स्वीकृत भएपछि ७२ घण्टाभित्र स्वचालित सूचना पठाउने व्यवस्था गरेको थियो। तर आन्दोलनका कारण प्रणाली अवरुद्ध हुँदा म्यानुअल सूचना प्रकाशन गर्न विभाग बाध्य भएको हो।
सवारी लाइसेन्स छपाइको जिम्मा पाएको सुरक्षण मुद्रण केन्द्रले छाप्ने कामलाई तीव्रता दिएको छ। मुद्रण केन्द्रले हालसम्म सरकारलाई २ हजार ४३१ थान लाइसेन्स हस्तान्तरण गरिसकेको छ।
पहिलो लटमा मंसिर ११ गते १ हजार ५६ थान लाइसेन्स, दोस्रो लटमा मंसिर १६ गते ४९७ थान, तेस्रो लटमा १७ गते ३७५ थान र चौथो लटमा १९ गते ५६३ थान लाइसेन्स बुझाइएको विभागले जनाएको छ।
गत कात्तिक १२ गते सरकार र मुद्रण केन्द्रबीच लाइसेन्स छपाइको सम्झौता भएको थियो। सम्झौता अनुसार मुद्रण केन्द्रले ६ महिनाभित्र १२ लाख थान लाइसेन्स हस्तान्तरण गर्नुपर्नेछ।
काभ्रे पनौती–५ स्थित सुरक्षण मुद्रण केन्द्रमा गत कात्तिक २१ गतेदेखि लाइसेन्स छपाइ प्रक्रिया सुरु गरिएको थियो।
