काठमाडौं । अमेरिकाको लुइसियानामा कार दुर्घटनामा परी दुई नेपाली विद्यार्थीको मृत्यु भएको छ। मृत्यु हुनेमा लुइसियाना टेक विश्वविद्यालयमा अध्ययनरत २२ वर्षीय राजन यादव र २० वर्षीय रोजिन ओली रहेका छन्।
१३ जुलाई राति करिब ९ बजेतिर भएको उक्त दुर्घटनामा अन्य दुई जना नेपाली विद्यार्थी घाइते भएका छन्। उनीहरूलाई स्थानीय अस्पतालमा उपचारका लागि भर्ना गरिएको छ।
लुइसियाना राज्य प्रहरीका अनुसार, यादवकै नाममा दर्ता भएको होन्डा एकर्ड कार सडकबाट चिप्लिएर रूखमा ठोक्किएको थियो। दुर्घटनामा राजन यादव स्वयं गाडी चलाइरहेका थिए। भारी वर्षाका कारण कार अनियन्त्रित भई दुर्घटनामा परेको प्रारम्भिक अनुमान गरिएको छ।
प्रहरीले घटनास्थलमै यादव र ओलीको मृत्यु भएको पुष्टि गरेको छ भने घटनाको थप अनुसन्धान भइरहेको जनाएको छ।
यस दुखद घटनाप्रति लुइसियाना टेक विश्वविद्यालयले शोक व्यक्त गर्दै विश्वविद्यालय समुदायमा गहिरो पीडा परेको जनाएको छ। विश्वविद्यालयले मृतक विद्यार्थीका परिवार, साथी तथा आफन्तप्रति समवेदना प्रकट गरेको छ।
नेपालको परराष्ट्र मन्त्रालय तथा अमेरिकास्थित नेपाली दूतावासले घटनाबारे जानकारी लिइरहेको जनाइएको छ। घाइते विद्यार्थीको अवस्थाबारे थप विवरण आउन बाँकी छ।
