काठमाडौं । अख्तियार दुरुपयोग अनुसन्धान आयोग (अख्तियार) ले सरकारी जग्गा व्यक्तिको नाममा प्लट मिलान गरी करौडौं रुपैयाँको आर्थिक चलखेल गरेको आरोपमा नापी अधिकृत सुग्रीव यादवविरुद्ध ५ करोड ७९ लाख ६२ हजार ४४० रुपैयाँ विगो माग गर्दै विशेष अदालत काठमाडौंमा भ्रष्टाचार मुद्दा दायर गरेको छ।
आयोगले दिएको विवरण अनुसार यादवले नापी कार्यालय भैरहरवा, रुपन्देही मा कार्यरत रहँदा माथिल्लो विभागीय प्रमुख र राजनीतिक व्यक्तिहरूलाई प्रभावमा पारेर उपसचिवको दरबन्दी रिक्त गराइ, वैदेशिक अध्ययनमा गएका कर्मचारीहरूको पद कायम गरी कार्यालय प्रमुख पदमा रहँदै सरकारी जग्गा प्लट मिलान गर्ने नाममा सार्वजनिक जग्गा व्यक्तिको नाममा हस्तान्तरण गरेको पाइएको छ।
जाँचका क्रममा आयोगले सार्वजनिक पद धारण गरेको २०७५/०३/१३ देखि २०७९/०३/१६ सम्मको अवधिमा यादवको आर्जन ९ करोड ३ लाख ९५ हजार ४४४ रुपैयाँ रहेको देखाएको छ। तर, सोही अवधिमा उनले १४ करोड ८३ लाख ५७ हजार ८८४ रुपैयाँ बराबरको सम्पत्ति खर्च र लगानी गरेका थिए।
अख्तियारले यादवले खर्च तथा लगानीको स्रोत ५ करोड ७९ लाख ६२ हजार ४४० रुपैयाँ प्रमाणित गर्न नसकेको ठहर गरेको छ। आयोगले उनका श्रीमती र छोराहरूको नाममा रहेको सम्पत्ति पनि जफत गर्न माग गरेको छ।
