जाजरकोट । जाजरकोटको छेडागाड नगरपालिकामा भएको बोलेरो जिप दुर्घटनामा दुई जनाको मृत्यु भएको छ भने चार जना घाइते भएका छन्।
मंगलबार बिहान करिब ११ बजे छेडागाड नगरपालिका–८ बाहार्नाखोला स्थित भित्री सडक खण्डमा छेडागाड नगरपालिका–९ पजारुबाट थलहतर्फ जाँदै गरेको क.प्र ०२–००१ च १३२७ नम्बरको डबल क्याब बोलेरो जिप ब्रेक फेल भई सडकबाट करिब १५० मिटर तल खसेको जिल्ला प्रहरी कार्यालय जाजरकोटले जनाएको छ। जिपमा चालकसहित ६ जना सवार थिए।
दुर्घटनामा छेडागाड नगरपालिका–९ पजारुकी ७० वर्षीया नन्दकला अधिकारी र २८ वर्षीय राजु अधिकारीको घटनास्थलमै मृत्यु भएको प्रहरीले पुष्टि गरेको छ।
जिल्ला प्रहरी कार्यालय जाजरकोटका सूचना अधिकारी सुधिर कुमार खड्काका अनुसार दुर्घटनाको सूचना बिहान ११ः५० बजे इलाका प्रहरी कार्यालय वडाबन जाजरकोटमा प्राप्त भएको थियो। सूचना प्राप्त हुनासाथ इलाका प्रहरी कार्यालय वडाबनबाट प्रहरी नायब निरीक्षक ओपेन्द्र बहादुर शाहीको कमाण्डमा टोली खटाइएको र तालुक जिल्ला प्रहरी कार्यालय जाजरकोटबाट प्रहरी निरीक्षक एक्क बहादुर नेपालीको कमाण्डमा थप टोली परिचालन गरिएको उनले जानकारी दिए।
दुर्घटनामा घाइते हुनेमा चालक छेडागाड नगरपालिका–९ का अन्दाजी २४ वर्षीय कृष्ण अधिकारी, छेडागाड नगरपालिका–८ की २० वर्षीया लक्ष्मी खत्री, छेडागाड नगरपालिका–९ का अन्दाजी ३९ वर्षीय वीरबहादुर अधिकारी र दैलेख नौमुले गाउँपालिका–६ की अन्दाजी २३ वर्षीया शीतला रावत रहेका छन्।
घाइते सबैको अवस्था मध्यम रहेको र उपचारका लागि नगर अस्पताल वडाबन जाजरकोट पठाइएको प्रहरीले जनाएको छ।
