बाजुरा । बाजुराको हिमाली गाउँपालिका–५ मा बिहीबार बिहान जिप दुर्घटना हुँदा दुई जनाको मृत्यु भएको छ भने १५ जना घाइते भएका छन्। जिल्ला प्रहरी कार्यालय बाजुराका अनुसार हिमाली गाउँपालिका–५ कै क्युडी गाउँबाट वडा कार्यालयतर्फ जाँदै गरेको बा.प्र. ०३–००१ ज ०३३८ नम्बरको जिप टुनीगडामा दुर्घटना भएको हो। दुर्घटनामा परी ७५ वर्षीया बाचा रोकाया र ७५ वर्षीय बिजौरा रोकायाको घटनास्थलमै मृत्यु भएको प्रहरीले जनाएको छ।
प्रहरी निरीक्षक देवबहादुर चौधरीका अनुसार जिप भित्री कच्ची सडकबाट करिब ३०० मिटर तल खसेको हो। बिहान करिब ९ बजे स्थानीयले फोनमार्फत दुर्घटनाको जानकारी दिएका थिए। जानकारी पाउनासाथ अस्थायी प्रहरी चौकी क्वाडी र इलाका प्रहरी कार्यालय कोल्टीबाट प्रहरी टोली घटनास्थलतर्फ पठाइएको छ। क्वाडीबाट घटनास्थल पुग्न झण्डै चार घण्टा लाग्ने भएकाले हालसम्म टोली पुगेको छैन।
घाइतेहरूको उद्दार तथा उपचारका लागि थप समन्वय भइरहेको प्रहरीले जनाएको छ।
