काठमाडौं । कालिकोटमा भएको बोलेरो जिप दुर्घटना मृत्यु हुनेको संख्या ७ पुगेको छ । ६ जनाको घटनास्थलमै र एकको प्रदेश अस्पताल सुर्खेतमा उपचारका क्रममा मृत्यु भएको हो । १३ जना घाइते छन् ।
क्षमताभन्दा तेब्बर बढी यात्रु बोकेको कर्णाली प्रदेश १ ज ५६ नम्बरको बोलेरो कालिकोटको पलाता गाउँपालिका–३ राडुनेटामा दुर्घटनामा परेको हो । दुई वर्षअघि ट्र्याक खुलेको सडकमा उकालो चढ्न नसक्दा बोलेरो सडकबाट ५ सय मिटर तल खसेको थियो । उक्त बोलेरो खिनबाट पलाता जाँदै गरेको कर्णाली प्रदेश प्रहरी कार्यालयले जनाएको छ । प्रहरीका अनुसार उक्त बोलेरोमा ५ यात्रु सिट पास भए पनि चालकसहित २० जना सवार थिए ।
मृत्यु हुनेमा पलाता गाउँपालिका–६ की दशकला शाही, पदम बम, भगवती रोकाया र गणेश शाही, पलाता–५ की छाँया शाही, पलाता–३ का दमन रोकाया र सल्यान घर भएका ४५ वर्षीय चालक धनीराम रावत रहेका छन् । रावतको उपचारको क्रममा प्रदेश अस्पताल कालागाउँमा मृत्यु भएको हो । जिप दुर्घटनामा घाइतेहरुको विभिन्न अस्पतालमा उपचार भइरहेको छ ।
पलाता गाउँपालिका–५ का दोली विक र आयुशा विक, पलाता–३ का दानबहादुर रोकाया, निर्मला रोकाया र जगत रोकायालाई नेपाली सेनाको हेलिकोप्टरबाट उद्धार गरेर उपचारका लागि प्रदेश अस्पताल सुर्खेतमा उपचार भइरहेको छ ।
