धनगढी। डडेलधुराको अमरगढी नगरपालिका –७ खस्यानाखानमा बोलेरो जीप दुर्घटना हुँदा दुई जनाको मृत्यु भएको छ।
धनगढीबाट दार्चुलाका लागि छुटेको सुपप्र०१–००१ ज १८५० नम्बरको जिप शनिबार बिहान करिब २ बजेतिर भीमदत्त राजमार्गको सडकबाट करिब ३०० मिटर तल खसेको हो। दुर्घटनाको कारण खुलिसकेको छैन।
दुर्घटनामा दार्चुलाको अपिहिमाल गाउँपालिका –१ का अन्दाजी ४५ सुगन लोथ्याल र सोही ठाउँका अन्दाजी २८ वर्षीया हनु लोथ्यालको ज्यान गएको डडेल्धुरा प्रहरीका प्रवक्ता भास्कर चन्दले बताए।
दुर्घटनामा परी दार्चुलाको मार्मा गाउँपालिकाका – ३ का ५० वर्षीय अमरसिंह ठगुन्ना र अपिहिमाल गाउँपालिका–१ का ३५ वर्षीया सरस्वती लोथ्याल र जिप चालक बैतडीको डिलासैनी गाउँपालिका–२ का २० बर्षीय अमृत घरेडी घाइते भएका छन्।
चालकको अवस्था सामान्य रहेको तथा अन्य दुई जनाको अवस्था मध्यम रहेको प्रहरीले जनाएको छ। उनीहरुको डडेल्धुरा अस्पतालमा उपचार भइरहेको छ।
