बुटवल । नेकपा एमाले लुम्बिनी संसदीय दलका नेता लिला गिरीले दल नेताबाट राजीनामा दिएका छन् । गिरीले राजीनामा दिएको पत्र पार्टी अध्यक्ष केपी शर्मा ओलीलाई पठाएको बताए ।
लुम्बिनी प्रदेशमा कांग्रेस–एमालेको गठबन्धनमा सरकारले संसदीय दलको नेताको हैसियतले गिरी मुख्य मन्त्री भएपनि पार्टी महासचिव शंकर पोखरेलको हस्तक्षेपको कारण उपनेता चेतनारायण आचार्य मुख्य मन्त्री बनेका छन् ।
दलको नेतालाई रोकेर उपनेता आचार्यलाई पार्टी महासचिव पोखरेलको जोडबलमा मुख्यन्त्री बनाइएको भन्दै गिरी रुष्ट बनेका हुन् ।मुख्यमन्त्री नियुक्तिका सन्दर्भमा संसदीय विधि, पद्दति भन्दा बाहिर गएर निर्णय भएको भन्दै राजीनामा बुझाएको गिरीले बताए ।
यसैबीच मुख्यमन्त्री आचार्यको शपथमा गिरी अनुपस्थित भएका छन् । अन्य पूर्व मुख्यमन्त्रीहरु शपथ ग्रहण समारोहमा सहभागी भए पनि गिरी भने सहभागी भएनन् ।
एमालेका २९ र कांग्रेसका २७ गरी ५६ सांसदको हस्ताक्षरमा एमालेका चेतनारायण आचार्य मुख्यमन्त्री बनेका थिए । यहाँ रहेका लोसपा, नाउपा, जनमत, जसपा, जसपा नेपालले सरकारलाई समर्थन गर्ने जनाएका छन् ।
