काठमाडौं । दसैँ, तिहार तथा छठ पर्वलाई लक्षित गर्दै सरकारले असोज २३ गतेदेखि लामो तथा मध्यम दूरीका सार्वजनिक सवारीसाधनको अग्रिम टिकट बुकिङ खुला गर्ने भएको छ।
यातायात व्यवस्था विभागमा मंगलबार बसेको सरोकारवालाको बैठकले यस्तो निर्णय गरेको हो। नेपाल यातायात व्यवसायी राष्ट्रिय महासंघका अध्यक्ष सरोज सिटौलाले असोज २३ देखि अग्रिम टिकट बुकिङ खुला गरिने जानकारी दिए।
लगातारको वर्षा तथा बाढीपहिरोका कारण अवरुद्ध भएका प्रमुख राजमार्ग तत्काल मर्मतसम्भार गरी यातायात सञ्चालन सहज बनाउने सरकारको प्रतिबद्धतापछि व्यवसायीहरू अग्रिम टिकट खोल्न सहमत भएका हुन्।
बैठकमा गृह मन्त्रालय, यातायात व्यवस्था विभाग, नेपाल प्रहरी, नेपाल यातायात व्यवसायी राष्ट्रिय महासंघ, मजदुर संघ–संगठन तथा उपभोक्तावादी संघसंस्थाका प्रतिनिधि सहभागी थिए।
दसैँमा राजधानीबाट ठूलो संख्यामा यात्रु बाहिरिने भएकाले यस वर्ष सार्वजनिक यातायात व्यवस्थापन चुनौतीपूर्ण हुने देखिएको छ। महासंघका अध्यक्ष पुण्यप्रसाद सिटौलाका अनुसार छोटो अवधिमा करिब १५ देखि १६ लाख यात्रुलाई व्यवस्थापन गर्नुपर्ने अवस्था छ।
यात्रुको चाप व्यवस्थापन गर्न लामो तथा मध्यम दूरीका सवारीसाधनलाई आवश्यकताअनुसार रिजर्भमा सञ्चालन गर्न फूलपातीदेखि पूर्णिमासम्म रुट परमिट खुला गरिएको छ।
दसैँको समयमा ढुवानीका सवारीसाधनले फलफूल, तरकारी, औषधि, खसी–बोका तथा अत्यावश्यक खाद्यान्नलगायत सामग्रीलाई प्राथमिकताका साथ ढुवानी गर्ने भएका छन्। अन्य सामग्रीको ढुवानी भने आवश्यकता हेरेर पछि सारिने विभागले जनाएको छ।
यसले चाडपर्वका बेला यात्रुवाहक सवारीसाधनको चाप व्यवस्थापनसँगै अत्यावश्यक वस्तुको आपूर्ति सहज बनाउने सरकारको तयारी छ।
यात्रुलाई टिकट, भाडा तथा यात्राका क्रममा देखिने अन्य समस्या समाधान गर्न विभिन्न स्थानमा यात्रु सहायता कक्ष सञ्चालनमा ल्याइएको छ। हाल १५ स्थानमा यस्ता कक्ष सञ्चालनमा छन्।
बसपार्क, कोटेश्वर र बल्खुलगायत प्रमुख स्थानमा यातायात व्यवस्था विभाग, यातायात व्यवसायी, मजदुर संगठन र ट्राफिक प्रहरी सम्मिलित संयुक्त कमिटीसमेत गठन गरिएको छ।
तोकिएकोभन्दा बढी भाडा लिएको, टिकटमा कालोबजारी गरेको वा यात्राका क्रममा अन्य समस्या भए सहायता कक्ष वा ट्राफिक प्रहरीको १०० नम्बरमा जानकारी गराउन सकिने व्यवस्था गरिएको छ।
विभागले व्यवसायीलाई तोकिएको भाडादरमा मात्र टिकट बिक्री गर्न र बिचौलियामार्फत हुने टिकटको कालोबजारी नियन्त्रण गर्न निर्देशन दिएको छ।
