काठमाडौं। निरन्तरको वर्षासँगै बाढीपहिरोका कारण देशका विभिन्न राष्ट्रिय राजमार्ग तथा सडकखण्डमा यातायात प्रभावित भएको छ।
सडक विभागका अनुसार वर्षाका कारण केही सडक अवरुद्ध छन् भने केहीमा पहिरो पन्छाएर यातायात सञ्चालनमा ल्याउने प्रयास भइरहेको छ।
सडक विभागले शुक्रबार बिहान सार्वजनिक गरेको विवरणअनुसार ११ वटा प्रमुख राष्ट्रिय राजमार्ग तथा सडकखण्डमा वर्षाजन्य समस्या देखिएको छ।
वर्षाका कारण पृथ्वी राजमार्ग अन्तर्गत कृष्णभीर, चाक्लिङभीर, जवाङ खोला र फिस्लिङलगायत स्थानमा यातायात प्रभावित भएको छ। निरन्तर वर्षाका कारण स्थानीय प्रशासनले अर्को सूचना जारी नभएसम्म यातायात सञ्चालनमा रोक लगाएको छ। विभिन्न स्थानमा पहिरो पन्छाउने काम सुरु गरिएको र राजमार्ग पुनः सञ्चालनमा ल्याउने प्रयास भइरहेको विभागले जनाएको छ।
त्यस्तै बीपी राजमार्ग अन्तर्गत माढी, पिप्ले, डाँडेखेत–काभ्रेपलाञ्चोक, चारसयबेँसी, कडुन्जे र चौकीडाँडालगायत क्षेत्रमा सडक अवरुद्ध भएको छ। पहिरो तथा ड्राइभर्सन बगाएका कारण अवरुद्ध सडक पुनः सञ्चालनमा ल्याउन प्रयास भइरहेको छ।
कान्ति राजमार्ग अन्तर्गत चपली र तिनकुने क्षेत्रमा पनि सडक प्रभावित भएको छ। मकवानपुरतर्फ पहिरो पन्छाएपछि यातायात सञ्चालनमा आएको छ भने ललितपुरतर्फ पहिरो हटाउने काम जारी छ।
सिद्धिचरण राजमार्ग अन्तर्गत ओखलढुंगा–सल्लेरी खण्डको सोलुखोला नजिक सडक अवरुद्ध भएको छ। सडक भासिएपछि रक ब्रेकरसहित एक्साभेटर र ह्विल लोडर परिचालन गरिएको छ। थप वर्षा नभएमा ब्याक कटिङ गरी शुक्रबार बेलुकासम्म यातायात सुधार गर्ने प्रयास भइरहेको विभागले जनाएको छ।
त्यस्तै मध्यपहाडी राजमार्ग अन्तर्गत निसी गाउँपालिका–कानाबगर क्षेत्रमा सडक अवरुद्ध छ। लेदो र पहिरो आउने क्रम जारी रहेकाले पहिरो हटाउने काम भइरहेको छ भने मेसिन साइटमै स्ट्यान्डबाइ राखिएको छ।
कालीगण्डकी करिडोर अन्तर्गत जैमिनी नगरपालिका–४, बेलबगरमा सडक अवरुद्ध भएको छ। ठूलो पहिरो गएको क्षेत्रमा पहिरो हटाउने मेसिन साइटमै राखिएको विभागले जनाएको छ।
बेनी–जोमसोम सडक अन्तर्गत म्याग्दीमा पनि सडक अवरुद्ध छ। यहाँ पहिरो हटाउन मेसिन परिचालन भइसकेको छ।
यसैगरी तमोर करिडोर (मुलघाट–किदिम) अन्तर्गत उँखु खोला, नावा खोला र रानीगाउँ क्षेत्रमा सडक अवरुद्ध भएको छ। खोलामा बहाव कम हुनासाथ सडक खुलाउने प्रयास गरिने विभागले जनाएको छ।
राप्ती राजमार्ग अन्तर्गत कपुरकोट–खारखोला क्षेत्रमा पहिरो हटाउने काम भइरहेको छ।
कर्णाली राजमार्ग अन्तर्गत गगने खोला, नाग्म–गमगाडको राँका क्षेत्र, बाजुरासिमल–दैलेखखोला तथा हारे नजिक सडक अवरुद्ध भएको छ। साना–ठूला पहिरो तथा ढुंगा खसेका स्थानमा पहिरो पन्छाउने काम जारी छ। विभागले हरेक लोकेसनमा लोडरसहितको टोली परिचालन गरेको जनाएको छ।
भालुवाङ–चन्द्रौटा–लिवाङ सडक का विभिन्न स्थानमा भने आंशिक अवरोध रहेको छ। साना सवारीसाधन सावधानीपूर्वक सञ्चालनमा रहेको र मेसिन परिचालन गरी पहिरो तथा ढुंगा हटाउने काम जारी रहेको विभागले जनाएको छ।
