धादिङ। लगातारको वर्षापछि पृथ्वी राजमार्गअन्तर्गत धादिङको कृष्णभीरमा पहिरो खसेको छ।
भोटेकोशी–त्रिशूली बाढीका कारण भदौ १४ गते सडक भासिएपछि सञ्चालनमा ल्याइएको नयाँ ट्र्याककै सुरक्षाका लागि बनाइएको ग्याबिन वाल भासिएपछि वैकल्पिक सडकसमेत जोखिममा परेको छ।
जिल्ला प्रहरी कार्यालय धादिङका डिएसपी प्रकाश दाहालका अनुसार कृष्णभीरमा बिहानैदेखि पहिरो खसिरहेको छ। पुरानो सडकतर्फको ग्याबिन वाल भासिए पनि अहिलेसम्म नयाँ ट्र्याकमा भने प्रत्यक्ष असर परेको छैन।
नयाँ ट्र्याकको तलबाट त्रिशूली नदीले कटान गरिरहेकाले पहिरो खस्ने क्रम जारी रहेको र जोखिम कायमै रहेको उनले बताए। यसले बाढीपछि सञ्चालनमा ल्याइएको वैकल्पिक सडकको स्थायित्वमाथि समेत चुनौती थपिएको छ।
बेनीघाट–१० कै तेराङखोला र ज्यामिरेघाट क्षेत्रमा पनि पहिरो खसेको डिएसपी दाहालले जानकारी दिए।
प्रमुख जिल्ला अधिकारी लक्ष्मी पाण्डेयका अनुसार कृष्णभीरमा गएरातिदेखि नै स–साना पहिरो खसिरहेका थिए। लगातारको वर्षाका कारण पृथ्वी राजमार्गका विभिन्न स्थानमा पहिरो खसेको उनले बताइन्।
उनका अनुसार राजमार्गको जुवाखोला, ज्यामिरे, परेवाभीर, कमेरेभीर, जहरेलगायत सात ठाउँमा पहिरो खसेको छ। केही स्थानमा जेसिबी परिचालन गरेर पहिरो हटाउने काम भइरहेको प्रशासनले जनाएको छ।
लगातार वर्षाका कारण पहिरो खस्ने क्रम बढेपछि प्रशासनले अर्को सूचना जारी नभएसम्मका लागि पृथ्वी राजमार्ग बन्द गरेको छ।
भोटेकोशी–त्रिशूली बाढीपछि मुख्य राजमार्गमा क्षति पुगेका कारण सञ्चालनमा ल्याइएको वैकल्पिक ट्र्याकमा समेत नदी कटान र पहिरोको जोखिम देखिएपछि पृथ्वी राजमार्गको आवागमन थप प्रभावित भएको हो।
