काठमाडौं । नेपाल राष्ट्र बैंकले नयाँ सिरिज र थप सुरक्षा विशेषतासहितको ५० रुपैयाँ दरको बैंकनोट आजदेखि चलनचल्तीमा ल्याउने भएको छ। साविककै आकार र रङमा ल्याइएको नयाँ नोटमा सुरक्षा धागोलगायतका विशेषता राखिएका छन्।
राष्ट्र बैंकका अनुसार नयाँ नोटमा ट २४, ०००००१ देखि ण ७०, ९९९९९९ सम्मका संकेत नम्बर रहनेछन्। नोटमा २०८३ साल असोज २ गतेदेखि चलनचल्तीमा ल्याइएको उल्लेख छ।
नयाँ नोटको अगाडिको भागमा ‘श्री नेपाल राष्ट्र बैंक, नेपाल सरकारको जमानत प्राप्त यसको रुपैयाँ भुक्तानी माग भएमा नेपाल राष्ट्र बैंकबाट रुपैयाँ ५० रुपैयाँ पचास तुरुन्त पाइने छ’ भन्ने प्रतिज्ञामूलक वाक्यांश राखिएको छ। बायाँतर्फ सगरमाथा हिमालको चित्र र दायाँतर्फ लालीगुराँसको पानी छाप छ। पानी छापमुनि ‘५०’ अंकसमेत देखिने व्यवस्था गरिएको छ।
नोटमा गभर्नर प्रा.डा. विश्वनाथ पौडेलको दस्तखत रहेको छ। त्यस्तै, १.२ मिलिमिटर चौडा कागजमा बुनिएको सुरक्षा धागो राखिएको छ। प्रकाशतर्फ पारेर हेर्दा उक्त धागो पूर्ण रूपमा देखिन्छ र त्यसमा ‘NRB’ लेखिएको हुन्छ।
नोटको पछाडिको भागमा भने हिउँ चितुवाको चित्र राखिएको छ। माथि ‘NEPAL RASTRA BANK’ र तल ‘RUPEES FIFTY’ लेखिएको छ भने सिरिजमा ‘2025 A.D.’ उल्लेख गरिएको छ।
यसअघि राष्ट्र बैंकले २०७७ असार २२ गतेदेखि ५० रुपैयाँ दरको सिरिज २०१९ को नोट चलनचल्तीमा ल्याएको थियो। त्यसबेला ज ८९, ०००००१ देखि ट २३, ९००००० सम्मका संकेत नम्बर मात्र चलनचल्तीमा ल्याइएको थियो।
