भोटेकोशी बाढी : राहत संकलनका लागि चार स्थान तोकिए, विदेशबाट आउने सामग्री विमानस्थलमा संकलन गरिने
काठमाडौं । रसुवाको भोटेकोशी नदीमा आएको बाढीबाट प्रभावित नागरिकका लागि राहत सामग्री सहयोग गर्न सरकारले संकलन केन्द्र तोकेको छ।
स्वदेश तथा विदेशबाट राहत सामग्री उपलब्ध गराउन इच्छुक व्यक्ति, संघसंस्था तथा सहयोगी निकायले सरकारले तोकेका केन्द्रमा सामग्री उपलब्ध गराउन सक्नेछन्।
विदेशबाट हवाई माध्यमबाट ल्याइने राहत सामग्री त्रिभुवन अन्तर्राष्ट्रिय विमानस्थलस्थित राष्ट्रिय आपतकालीन गोदामघरमा संकलन गरिनेछ। संकलित सामग्री आवश्यकताका आधारमा सरकारले बाढी प्रभावित क्षेत्रमा पठाउने व्यवस्था मिलाउनेछ।
विदेशबाट राहत सामग्री पठाउन चाहनेले WFP प्रतिनिधि श्रद्धा भट्टराई (सम्पर्क नं. ९८४१८७९२२२) मार्फत समन्वय गर्न सक्ने व्यवस्था गरिएको छ।
स्वदेशभित्र राहत सामग्री संकलन केन्द्र
सरकारले स्वदेशभित्र राहत सामग्री संकलनका लागि चार स्थान तोकेको छ।
१. निर्वाचन आयोग, कान्तिपथ, काठमाडौं सम्पर्क: सशस्त्र प्रहरी निरीक्षक अमर बरामु – ९८५१०६५८७४
२. सहरी विकास तथा भवन निर्माण विभाग, बबरमहल, काठमाडौं सम्पर्क: हिमविक्रम केसी – ९८५१०८५२०३
३. नेपाली सेना मैथिली ब्यारेक, बट्टार, नुवाकोट सम्पर्क: आविष्कार – ९८५१२३४३२४
४. नेपाली सेना बैरेनी ब्यारेक, धादिङ सम्पर्क: दिलीप घले – ९८५११५४२२६
यसका अतिरिक्त राहत सहयोग गर्न इच्छुक व्यक्ति तथा संस्थाले सम्बन्धित जिल्लाका प्रमुख जिल्ला अधिकारी (सीडीओ) मार्फत पनि राहत सामग्री उपलब्ध गराउन सक्नेछन्।
सरकारले बाढी प्रभावित क्षेत्रमा तत्काल आवश्यक पर्ने राहत सामग्री व्यवस्थित रूपमा संकलन तथा वितरण गर्न यस्तो व्यवस्था गरेको जनाएको छ।
