काठमाडौँ। नेपाली कांग्रेसका संसदीय दलका नेता भीष्मराज आङदेम्बेले सरकारको कार्यशैलीप्रति तीव्र असन्तुष्टि व्यक्त गर्दै वर्तमान शासन व्यवस्था लोकतान्त्रिक मूल्य र संसदीय गरिमाविपरीत चल्न खोजेको आरोप लगाएका छन्।
मंगलबार प्रतिनिधि सभाको बैठकलाई सम्बोधन गर्दै उनले सरकार जनतासँग प्रत्यक्ष संवाद गर्नुको साटो सामाजिक सञ्जालमा मात्र सीमित भएको टिप्पणी गरे। ‘सरकारलाई फेसबुकमा खोज्नुपर्ने दुर्भाग्य हाम्रा लागि सुखद छैन,’ नेता आङदेम्बेले भने, ‘नसुनिने र संवादहीन शैली लोकतन्त्र अनुकूल देखिएन।’
अध्यादेशको ‘पहिरो’ र संसदीय गरिमामा चोट
अधिवेशन आह्वान भइसकेपछि एकाएक स्थगन गरेर डेढ सयभन्दा बढी कानुनहरू अध्यादेशमार्फत ल्याएकोमा कांग्रेसले कडा आपत्ति जनाएको छ। नेता आङदेम्बेले यसलाई संसदीय अधिकार खोसिएको र अध्यादेशको पहिरो लागेको भीरको डिलको संज्ञा दिए उनले सरकारले संसदको महत्त्वलाई आत्मसात् गर्न नसकेको र आदेशको भरमा शासन चलाउन खोजेको आरोप लगाए।
गृहमन्त्रीमाथि छानबिन खोई?
नेता आङदेम्बे अरूलाई भ्रष्टाचारको आरोपमा ‘अल्गोरिदेमिक’ खेदाइ गर्ने सरकारले आफ्नै तत्कालीन गृहमन्त्रीमाथि लागेका संगीन आरोपहरूको निष्पक्ष छानबिन गर्न किन हच्किएको भन्दै सुशासनको नारामाथि प्रश्न उठाए। २
गरिबमाथि क्रुरता
सुकुम्बासी र भूमिहीनहरूलाई मानवीय आत्मसम्मान कुल्चिएर सडकमा फालिएको भन्दै उनले सरकार यमदूतजस्तो क्रुर बनेको आरोप लगाए। ‘गरिबका बस्तीमा छद्म पोसाकका सुरक्षाकर्मीको दबाब र गुण्डागर्दी बढाइयो,’ उनले भने।
लोकप्रियतावाद र १०० बुँदे घोषणा
प्रधानमन्त्रीका १०० दिनका १०० बुँदा केवल सस्तो प्रचारबाजी र आश्वासन मात्र हुने हो कि भन्ने चिन्ता व्यक्त गर्दै आङदेम्बेले ३० दिनभित्र गर्ने भनिएका बाचा अझै बेवारिसे रहेको उल्लेख गरे।
संविधान संशोधनमा विज्ञ आयोगको माग
संविधान संशोध जस्तो गम्भीर विषयमा कार्यदल बनाएर मात्र नहुने भन्दै कांग्रेसले सर्वोच्च अदालतका बहालवाला वा पूर्वन्यायाधीशको संयोजकत्वमा सर्वपक्षीय संविधान सुधार सुझाव आयोग गठन गर्न माग गरेको छ।
प्रधानमन्त्रीको व्यवहारमाथि कटाक्ष
नीति तथा कार्यक्रम पेस भइरहँदा प्रधानमन्त्री बैठकको बीचैबाट उठेर हिँडेको प्रसङ्ग निकाल्दै आङदेम्बेले यसलाई अमर्यादित र अहंकारपूर्ण व्यवहार भनेका छन्। ‘संसारको कुन देशको प्रधानमन्त्री नीति कार्यक्रम पेस हुँदा बीचैमा उठेर हिँड्छ? अब गिनिज बुकमा नाम लेखिने भयो,’ उनले व्यङ्ग्य गर्दै भने, ‘यदि स्वास्थ्यमा समस्या आएको हो भने संसदलाई जानकारी गराइयोस्, होइन भने यो सदनको गरिमामा लागेको दाग हो।’
