काठमाडौं। युद्धविरामका बीच लेबनानमा इजरायलले आक्रमण गरेको छ। लेबनानको स्वास्थ्य मन्त्रालयका अनुसार आइतबार भएको इजरायली आक्रमणमा १४ जनाको मृत्यु भएको छ। जसमा दुई बालबालिका र दुई महिला पनि छन्। आक्रमणमा परी ३७ जना घाइते भएका छन्।
यो आक्रमण यस्तो समयमा भएको हो, जब दुवै देशबीच गत बिहीबार मात्रै युद्धविरामलाई तीन हप्ताका लागि थपिएको थियो।
सम्झौताअनुसार इजरायललाई आफ्नो सुरक्षाका लागि आवश्यक परेको खण्डमा जुनसुकै समयमा कदम चाल्न पाउने अधिकार छ।
आक्रमणअघि इजरायल डिफेन्स फोर्स (आईडीएफ) का प्रवक्ताले दक्षिण लेबनानका धेरै गाउँहरूमा चेतावनी जारी गरेका थिए। उनले मानिसहरूलाई ती स्थान तुरुन्तै छोड्न भन्दै त्यहाँ बसिरहनु ज्यानको लागि खतरा हुने उल्लेख गरेका थिए।
हिजबुल्लाहका गतिविधिहरूले युद्धविरामको उल्लंघन गरिरहेको इजरायली प्रधानमन्त्री बेन्जामिन नेतान्याहुको दाबी छ।
