काठमाडौं। प्रतिनिधिसभा सदस्यको निर्वाचनपछि गठन भएको संसदको पहिलो अधिवेशन आज बिहीबारदेखि सुरु हुँदैछ।
सिंहदरबास्थित निर्माणाधीन संघीय संसद् भवनको बहुद्देश्यीय हलमा बिहीबार दिउँसो २ बजेका लागि प्रतिनिधिसभा बैठक बस्दैछ।
संसद् सचिवालयका प्रवक्ता एकराम गिरीका अनुसार आजको बैठकमा तीन अध्यादेश पेस गर्ने कार्यसूची छ।
गृहमन्त्री सुधन गुरुङले ‘मतदाता नामावली (पहिलो संशोधन) अध्यादेश २०८२’, ‘प्रतिनिधिसभा सदस्य निर्वाचन (पहिलो संशोधन) अध्यादेश, २०८२’ र ‘नेपाल विशेष सेवा (दोस्रो संशोधन) अध्यादेश २०८२’ पेस गर्ने सम्भावित कार्यसूची तय भएको छ।
त्यसअघि बैठकमा सभाका ज्येष्ठ सदस्य अर्जुननरसिंह केसीले राष्ट्रपतिबाट प्राप्त अधिवशेन आह्वानसम्बन्धी पत्र तथा राष्ट्रपतिको कार्यालयबाट प्राप्त प्रधानमन्त्री पदमा नियुक्ति तथा मन्त्रिपरिषद् गठनसम्बन्धी पत्रहरुको ब्यहोरा पढेर सुनाउनेछन्।
२७५ सदस्यीय प्रतिनिधिसभामा राष्ट्रिय स्वतन्त्र पार्टीका १८२, कांग्रेसका ३८, एमालेका २५, नेकपाका १७, श्रम संस्कृतिका सात, राप्रपाका पाँच र एक स्वतन्त्र सांसदको उपस्थिति छ।
संसदले २२ फागुनभित्र सभामुख पाउने
आज सभामुखको अनुपस्थितिमा बैठकको अध्यक्षता गर्न सदस्यहरूको मनोनय गर्ने सम्भावित कार्यसूची रहेको छ।
बैठकमा अधिवेशन प्रारम्भका अवसरमा दलीय आधारमा सदस्यले मन्तव्य राख्ने कार्यसूची छ। सोही बैठकमा सभामुखले प्रतिनिधिसभा नियमावली, २०७९ को नियम ७ बमोजिम प्रतिनिधिसभाको सभामुख पदको निर्वाचनका लागि दिन तोक्नेछन्।
प्रतिनिधि सभाले सभामुख भने २२ चैतभित्र पाउने छ।
बुधबार बसेको सर्वदलीय बैठकले प्रतिनिधि सभाको पहिलो बैठकबाटै सभामुख चयनको कार्यतालिका प्रकाशित गर्न महासचिवलाई जिम्मेवारी दिने सहमति जुटाएको थियो।
रास्वपा झन्डै दुई तिहाइ सिटसहित पहिलो दलको हैसियतमा छ। उसले बनाएको उम्मेदवार स्वतः चयन हुने सुनिश्चित छ।
रास्वपाले उपसभापति समेत रहेका डिपी अर्याललाई सभामुख बनाउने तयारी गरेको छ।
