काठमाडौं। नेपाली कांग्रेसले पछिल्लो निर्वाचनको समीक्षा तथा आगामी राजनीतिक रणनीति तय गर्न देशभर सातै प्रदेशमा क्षेत्रगत समीक्षा कार्यक्रम सञ्चालन गर्ने भएको छ।
पार्टीका महामन्त्री प्रदीप पौडेलद्वारा जारी प्रेस नोटअनुसार केन्द्रीय कार्यसमितिको चैत १० र ११ गते सम्पन्न बैठकको निर्णयबमोजिम १६५ वटै प्रतिनिधिसभा निर्वाचन क्षेत्रका उम्मेदवारसँग निर्वाचन समीक्षात्मक छलफल गरिनेछ। साथै केन्द्रीय प्रतिनिधिको उपस्थितिमा सबै निर्वाचन क्षेत्रमा अध्ययन तथा समीक्षा प्रक्रिया अघि बढाइने जनाइएको छ।
पार्टीले प्रदेशगत रूपमा तोकिएको मिति र स्थानमा कार्यक्रम आयोजना गर्ने निर्णय गरेको छ। पहिलो कार्यक्रम विराटनगरमा चैत २३ गते हुनेछ, जहाँ संयोजकको जिम्मेवारी डिला संग्रौला पन्तलाई दिइएको छ। त्यसपछि जनकपुरमा चैत २५ गते फरमूल्लाह मंसुरको संयोजनमा कार्यक्रम हुनेछ।
यस्तै, पोखरामा चैत २७ गते देवराज चालिसे, दाङमा चैत २९ गते योगेन्द्र चौधरी, सुर्खेतमा वैशाख ३ गते कर्णबहादुर बुढा, कैलालीमा वैशाख ५ गते प्रकाश रसाइली स्नेही र हेटौडामा वैशाख ७ गते बहादुर सिंह लामाको संयोजनमा कार्यक्रम तय गरिएको छ।
पार्टीले सम्बन्धित प्रदेशभित्र रहेका केन्द्रीय सदस्य, प्रदेश पदाधिकारी, जिल्ला सभापति, प्रतिनिधिसभा तथा प्रदेशसभा क्षेत्रीय सभापति, प्रदेशसभा सदस्य र प्रतिनिधिसभाका प्रत्यक्ष तथा समानुपातिक उम्मेदवारहरूको उपस्थितिमा कार्यक्रम सञ्चालन गरिने जनाएको छ।
कांग्रेसले यस अभियानलाई आगामी संगठन सुदृढीकरण, निर्वाचन तयारी र राजनीतिक दिशा तय गर्ने महत्त्वपूर्ण चरणका रूपमा लिएको बताएको छ।
