काठमाडौं। नेपाल धितोपत्र बोर्डको प्रारम्भिक जाँचबुझ प्रतिवेदनका आधारमा सन नेपाल लाइफ इन्स्योरेन्स कम्पनी लिमिटेडका प्रमुख कार्यकारी अधिकृत राजकुमार अर्याल धितोपत्र सम्बन्धी कसूरमा पक्राउ परेका छन्।
नेपाल प्रहरीका अनुसार धितोपत्र सम्बन्धी ऐन, ०६३ अन्तर्गतको दफा १०० विपरीत कसूर गरेको देखिएको आधारमा काठमाडौं जिल्ला अदालतबाट पक्राउ अनुमति लिएर अर्याललाई काठमाडौं महानगरपालिका-२९, न्यूप्लाजा पुतलीसडक क्षेत्रबाट पक्राउ गरिएको हो।
प्रहरी प्रवक्ता प्रहरी वरिष्ठ उपरीक्षक शिवकुमार श्रेष्ठले जारी गरेको सूचनाअनुसार कम्पनीले आफ्नै कर्मचारीका लागि छुट्याएको शेयर बाँडफाँटसम्बन्धी विवरण नियामक निकायमा पेश गर्दा सक्कल आवेदन फाराम र त्यसका प्रतिलिपिबीच फरक विवरण भेटिएको थियो। एउटै विषयका कागजात फरकफरक निकायमा फरक विवरणसहित पेश भएको देखिएपछि नियामक निकायले यसलाई गम्भीर अनियमितताको रूपमा लिएको जनाएको छ।
प्रारम्भिक अनुसन्धानमा कम्पनीबाट पेश गरिएका आवेदन फाराम, प्रतिलिपि विवरण तथा शेयर बाँडफाँट प्रक्रियामा पारदर्शितामाथि प्रश्न उठेको बताइएको छ। यही आधारमा धितोपत्र बोर्डले तयार गरेको प्रारम्भिक प्रतिवेदन प्रहरीलाई उपलब्ध गराइएको थियो।
धितोपत्र सम्बन्धी ऐन, ०६३ को दफा १०० अनुसार गलत विवरण पेश गर्ने, तथ्य लुकाउने वा लगानीकर्ता तथा नियामक निकायलाई भ्रममा पार्ने कार्यलाई दण्डनीय कसूर मानिन्छ। यस्तो कसूर पुष्टि भएमा जरिवाना, कैद वा दुवै सजाय हुन सक्ने कानुनी व्यवस्था छ।
राजकुमार अर्याल गुल्मीको गुल्मी दरबार गाउँपालिका–५ स्थायी घर भई हाल काठमाडौंको बनस्थली क्षेत्रमा बसोबास गर्दै आएका छन्। प्रहरीले उनलाई नियन्त्रणमा लिएर थप अनुसन्धान अघि बढाएको जनाएको छ।
