काठमाडौं। नेपाल वायु सेवा निगम (नेपाल एयरलाइन्स) मा जहाज खरिद, मर्मत र समग्र व्यवस्थापनमा अनियमितता तथा भ्रष्टाचार भएको आरोप बढेपछि संस्कृति, पर्यटन तथा नागरिक उड्डयन मन्त्रालयले पाँच सदस्यीय अध्ययन समिति गठन गरेको छ।
मन्त्रालयको सचिवस्तरीय निर्णयबाट बनेको समितिलाई ३० दिनभित्र विस्तृत अध्ययन प्रतिवेदन बुझाउने जिम्मेवारी दिइएको छ।
मन्त्रालयका अनुसार समितिले निगमभित्र लामो समयदेखि उठ्दै आएका वेथिति, जहाज सञ्चालनमा देखिएका आर्थिक अनियमितता, मर्मत प्रक्रियामा भएको खर्च, खरिद निर्णय र प्रशासनिक कमजोरीबारे प्रमाण संकलन गरेर अध्ययन गर्नेछ।
विशेषगरी जहाज खरिददेखि मर्मतसम्मका विभिन्न निर्णयमा लागत अस्वाभाविक रूपमा बढेको, प्रक्रियागत पारदर्शिता नदेखिएको र व्यवस्थापन तहमा जिम्मेवारी अस्पष्ट रहेको विषय छानबिनको केन्द्रमा रहनेछ।
समितिलाई केवल तथ्य संकलनमा सीमित नराखी, अनियमितता देखिए कार्यान्वयन गर्न मिल्ने सुधार योजना र जिम्मेवार निकाय तोकेर प्रतिवेदन दिन कार्यादेश दिइएको छ। अर्थात्, प्रतिवेदनले दोषी पहिचानसँगै आगामी दिनमा निगमलाई कसरी सुधार गर्ने भन्ने स्पष्ट कार्ययोजना पनि समेट्नेछ।
नेपाल एयरलाइन्समा विगतदेखि जहाज मर्मतमा ढिलाइ, ग्राउन्डेड जहाज, उच्च सञ्चालन खर्च, टिकट व्यवस्थापनमा कमजोरी र व्यवस्थापकीय विवाद बारम्बार उठ्दै आएका छन्। पछिल्लो समिति गठनलाई ती सबै आरोपलाई औपचारिक रूपमा परीक्षण गर्ने सरकारी प्रयासका रूपमा हेरिएको छ।
