काठमाडौं। अख्तियार दुरुपयोग अनुसन्धान आयोगले अछामको ढकारी गाउँपालिकाका अध्यक्ष प्रकाशबहादुर साउदसहित चार जनाविरुद्ध विशेष अदालतमा भ्रष्टाचार मुद्दा दायर गरेको छ।
आयोगका अनुसार राजेश हमाल अभिनित निर्माणाधीन ‘अन्धपथ’ चलचित्रका लागि बजेट विनियोजन नै नभएको अवस्थामा गाउँपालिकाबाट १५ लाख ५ हजार रुपैयाँ खर्च गर्ने सम्झौता गरिएको थियो।
अनुसन्धानमा गाउँपालिका अध्यक्ष प्रकाशबहादुर साउद, तत्कालीन निमित्त प्रमुख प्रशासकीय अधिकृत लक्ष्मण साह, लेखापाल विमल साउद र आरजे २४ न्युज तथा नव इन्द्रेणी फाउण्डेसनका अध्यक्ष रामजी लम्सालबीच मिलेमतो गरी सार्वजनिक खरिद कानुनविपरीत सोझै सम्झौता गरिएको पाइएको आयोगले जनाएको छ।
सार्वजनिक खरिद ऐन र नियमावलीले तोकेको प्रक्रिया नअपनाई प्रतिस्पर्धाविनै सम्झौता गरिएको, कानुनले तोकेको २० प्रतिशतभन्दा बढी अग्रिम रकम दिने सर्त राखिएको र बैंक जमानतबिनै ५८ प्रतिशतसम्म पेश्की भुक्तानी गरिएको आरोपपत्रमा उल्लेख छ।
त्यसैगरी चलचित्र निर्माणका नाममा पेश गरिएका बिलहरूको सत्यता पुष्टि नहुने, सम्झौता आरजे २४ न्युजसँग भए पनि भुक्तानी नव इन्द्रेणी फाउण्डेसनलाई गरिएको तथा झुट्टा बिलका आधारमा थप खर्च गरिएको आयोगको दाबी छ।
आयोगले चारै जनाबाट १२ लाख ७७ हजार २५० रुपैयाँ बिगो कायम गरी भ्रष्टाचार निवारण ऐनअनुसार कैद, जरिवाना र बिगो असुलउपरको मागदाबी गरेको छ। गाउँपालिका अध्यक्ष साउदविरुद्ध पदमा बसेर भ्रष्टाचार गरेको भन्दै थप सजायसमेत माग गरिएको छ।
