काठमाडौं। अमेरिकी राष्ट्रपति डोनाल्ड ट्रम्पले इरानविरुद्ध अत्यन्त कडा अभिव्यक्ति दिँदै अमेरिकी सैन्य कारबाहीलाई अझै तीव्र बनाइने संकेत गरेका छन्। आफ्नो सामाजिक सञ्जाल मार्फत उनले इरानको सैन्य संरचना, हवाई क्षमता र नेतृत्वमाथि ठूलो क्षति पुगेको दाबी गरेका हुन्।
ट्रम्पले इरानको नौसेना लगभग समाप्त भएको, वायुसेना अस्तित्वहीन अवस्थामा पुगेको, मिसाइल र ड्रोन प्रणाली निरन्तर नष्ट भइरहेको तथा इरानी नेतृत्वलाई धर्तीको नक्साबाट हटाइँदै गएको बताएका छन्। साथै उनले अमेरिकासँग अतुलनीय सैन्य शक्ति, असीमित गोला–बारुद र पर्याप्त समय रहेको उल्लेख गर्दै कारबाही जारी रहने चेतावनी दिएका छन्।
उनले पछिल्ला ४७ वर्षदेखि इरानले विश्वभर निर्दोष नागरिकमाथि हिंसा गरेको आरोप लगाउँदै आफू अमेरिकाको ४७औँ राष्ट्रपतिका रूपमा त्यसको अन्त्य गरिरहेको बताएका छन्। ट्रम्पको भनाइले अमेरिकी प्रशासन इरानमाथि सैन्य, आर्थिक र कूटनीतिक सबै मोर्चाबाट दबाब बढाउने रणनीतिमा रहेको संकेत गरेको छ।
हाल मध्यपूर्वमा तनाव चर्किँदै गएको छ। इरानले खाडी क्षेत्रमा आक्रमणको दायरा विस्तार गरिरहेको आरोप लागिरहेका बेला अमेरिका र उसका साझेदार मुलुकहरूले सुरक्षा सतर्कता बढाएका छन्। तेल बजार, समुद्री मार्ग र क्षेत्रीय सुरक्षामा यसको प्रत्यक्ष प्रभाव देखिन थालेको अन्तर्राष्ट्रिय विश्लेषकहरू बताउँछन्।
राजनीतिक विश्लेषकहरूका अनुसार ट्रम्पको पछिल्लो अभिव्यक्ति केवल चेतावनी मात्र नभई आगामी सैन्य निर्णयको संकेत पनि हुन सक्छ। यदि तनाव अझ बढेमा मध्यपूर्वमा शक्ति सन्तुलन फेरि अस्थिर हुन सक्ने चिन्ता व्यक्त गरिएको छ।
