काठमाडौं। शिखर पावर डेभलपमेन्ट कम्पनीको आइपिओमा भोलि मंगलबारसम्म आवेदन दिन पाइने भएको छ।
९८ करोड रुपैयाँको ३२.६५ प्रतिशत सेयर १७ फागुनमा सर्वसाधारणका लागि निष्कासन भएकामा आवेदनका लागि मंगलबार अन्तिम दिन रहेको सिडिएस एन्ड क्लियरिङ लिमिटेडले जनाएको छ। सर्वसाधारका लागि सेयर निस्काशन गर्दा कम्तीमा चार कार्य दिन खुला गर्नुपर्ने व्यवस्था छ।
तर, १७ फागुनमा आइपिओ निस्काशन पश्चात प्रतिनिधिसभा निर्वाचनका लागि तीन दिन सार्वजनिक बिदा, शनिबार र नारी दिवसको बिदाका कारण आवेदन अवधि मंगलबार बैंकिङ समयसम्म कायम भएको हो।
प्रतिकित्ता एक सय रुपैयाँ अंकित १८ लाख ४२ हजार ६ सय कित्ता सेयरमा आवेदन दिन पाइन्छ।
कम्पनीले बागलुङमा ४.९६ मेगावाटको भीमखोला स्मल हाइड्रोपावर आयोजना सञ्चालनमा ल्याएको छ। इक्रा नेपालले बीबी रेटिङ प्रदान गरेको छ।
कम्पनीले पहिलो चरणमा आयोजना प्रभावित स्थानीयबासी र वैदेशिक रोजगारमा रहेकालाई सेयर बाँडफाँट गरिसकेको छ।
न्यूनतम १० तथा अधिकतम १० हजार कित्तासम्म आवेदन दिन सकिने बिक्री प्रबन्धक ग्लोबल आईएमई क्यापिटलले जनाएको छ। क्यापिटलका अनुसार अनलाइन प्रणाली मेरोसेयरमार्फत आवेदन दिन सकिनेछ।
