काठमाडौं । माघे संक्रान्तिको बिहानै सुनसरीको भोक्राहानर्सिङ गाउँपालिका–८ सोनियाहीमा भएको ट्रक दुर्घटनामा पाँच जना मजदुरको मृत्यु भएको छ। दुर्घटनापछि आक्रोशित स्थानीयवासीले सुनसरीको बर्जु गाउँपालिकामा टायर बाल्दै सडक अवरुद्ध गरेका छन्।
बिहीबार बिहान करिब साढे ५ बजे विराटनगरबाट सप्तरीको राजविराजतर्फ जाँदै गरेको को १ ख ४५४१ नम्बरको ट्रक हुलाकी राजमार्गअन्तर्गत घुम्तीमा अनियन्त्रित भई पल्टिएको जिल्ला प्रहरी कार्यालय सुनसरीले जनाएको छ। टायल र मार्बल लोड गरिएको ट्रक तीव्र गतिका कारण दुर्घटनामा परेको प्रहरीको प्रारम्भिक अनुसन्धानले देखाएको छ।
जिल्ला प्रहरी कार्यालय सुनसरीका प्रवक्ता चन्द्र खड्काका अनुसार ट्रकको पछाडि सामानमाथि बसेका पाँच जना मजदुर टायल र मार्बलले थिचिएर घटनास्थलमै मृत्यु भएको हो। मृत्यु हुने सबै मजदुर सुनसरीको बर्जु गाउँपालिका–१ का बासिन्दा हुन्।
मृत्यु हुनेमा ३२ वर्षीय धीरेन्द्र गुरुङ, ५५ वर्षीय बर्मदेव गुरुङ, ५० वर्षीय टंक गुरुङ, २८ वर्षीय निसु गुरुङ र ५५ वर्षीय चन्द्र गुरुङ रहेका छन्। ट्रकमा चालकसहित कुल ९ जना सवार थिए। क्याबिनमा सवार चार जनामध्ये तीन जना सामान्य घाइते भएका छन्। उनीहरूको विराटनगरस्थित विराट नर्सिङ होममा उपचार भइरहेको प्रहरीले जनाएको छ।
दुर्घटनापछि ट्रक चालक फरार रहेका छन्। प्रहरीले उनको खोजी कार्य तीव्र बनाएको जनाएको छ।
आफ्नै वडाका पाँच जनाको अकालमा मृत्यु भएपछि बर्जु गाउँपालिकाका स्थानीयवासी आन्दोलित भएका हुन्। उनीहरूले शुक्रबारे चोकमा टायर बालेर प्रदर्शन गर्दै यातायात सेवा ठप्प पारेका छन्। मृतकका परिवारलाई उचित क्षतिपूर्ति र फरार चालकलाई कडा कारबाहीको माग गर्दै प्रदर्शन जारी रहेको स्थानीयले बताएका छन्।
स्थानीयका अनुसार शव पोस्टमार्टमका लागि लगिए पनि हालसम्म प्रक्रिया सुरु नभएकाले थप आक्रोश बढेको छ।
