काठमाडौं । रिज लाइन इनर्जी लिमिटेडले आयोजना प्रभावित स्थानीयका लागि निष्कासन गरेको आईपीओमा आवेदन दिने आज पुस २८ गते अन्तिम दिन रहेको छ। कम्पनीले पुस १३ गतेदेखि आयोजना प्रभावितलाई लक्षित गर्दै आईपीओ निष्कासन गरेको हो।
कम्पनीले प्रतिकित्ता १०० रुपैयाँका दरले कुल २६ लाख ७ हजार कित्ता आईपीओ जारी गर्न नेपाल धितोपत्र बोर्डबाट मंसिर २२ गते अनुमति पाएको थियो। यसमध्ये ११ लाख ८५ हजार कित्ता शेयर आयोजना प्रभावितका लागि छुट्याइएको छ।
आयोजना प्रभाविततर्फ गोरखाको अजिरकोट गाउँपालिकाका सबै वडाहरू, लमजुङको दूधपोखरी गाउँपालिका वडा नम्बर १, २ र ३, तथा दोर्दी गाउँपालिका वडा नम्बर ४, ५ र ६ का स्थानीय बासिन्दाहरूले आवेदन दिन सक्नेछन्। आवेदन गर्दा न्यूनतम १० कित्तादेखि अधिकतम ५० हजार कित्तासम्म माग गर्न सकिने व्यवस्था छ।
आईपीओ निष्कासनका लागि गराइएको रेटिङमा केयर रेटिङ नेपाल लिमिटेडले कम्पनीलाई ‘केयर एनपी डबल बी इस्यूअर’ रेटिङ दिएको छ। यस रेटिङले समयमै वित्तीय दायित्व भुक्तानी गर्ने क्षमतामा मध्यम स्तरको जोखिम रहेको संकेत गर्दछ। कम्पनीको आईपीओ निष्कासन तथा बाँडफाँडको जिम्मेवारी प्रभु क्यापिटल लिमिटेडले लिएको छ।
आयोजना प्रभावितहरूले गोरखास्थित कम्पनीको आयोजना कार्यालय, प्रभु क्यापिटलको कमलादीस्थित कार्यालय, क्यापिटलले उपलब्ध गराएको अनलाइन लिंक, साथै प्रभु बैंकको छेपेटार र पालुङटार शाखामार्फत आवेदन दिन सक्नेछन्।
त्यसैगरी वैदेशिक रोजगारीमा रहेका नेपालीहरूले नेपाल धितोपत्र बोर्डबाट अनुमति लिई आस्वा सेवा सहभागी बैंक तथा वित्तीय संस्था र सिआस्वा प्रणालीमार्फत आवेदन दिन सक्नेछन्। पहिलो चरणको आईपीओ बाँडफाँड सम्पन्न भएपछि दोस्रो चरणमा सर्वसाधारणका लागि आईपीओ निष्कासन गरिने कम्पनीले जनाएको छ।
