सर्लाही । सर्लाहीमा घाँटी छिनाएर हत्या गरिएका वन हेरालु रामईश्वर महतोको टाउको फेला परेको छ। घटनास्थल नजिकैको झाडीमा केही समयअघि टाउको फेला परेको सर्लाही प्रहरीका प्रवक्ता डीएसपी सरोज राईले जानकारी दिए।
उनका अनुसार टाउको नभएको शव शनिबार नै फेला परेको थियो। घटनास्थलको मुचुल्का तथा अनुसन्धान प्रक्रिया पूरा गरी शव पोस्टमार्टमका लागि प्रादेशिक अस्पताल मलंगवा पठाइएको छ।
शनिबार सर्लाहीको ईश्वरपुर नगरपालिका–२ राईटरखोरस्थित सागरनाथ वन विकास परियोजनाको जंगलभित्र ४७ वर्षीय महतोको टाउको नभएको शव घरदेखि करिब ५०० मिटर टाढा फेला परेको थियो। महतो सोही परियोजनामा ज्यालादारीमा वन हेरालुको रूपमा कार्यरत थिए।
घटनाको अनुसन्धानका लागि धनुषाको लालगढबाट तालिमप्राप्त कुकुर झिकाइएको छ। साथै घटनामा संलग्न हुन सक्ने आशंकामा प्रहरीले एक जनालाई पक्राउ गरी थप अनुसन्धान गरिरहेको जनाएको छ।
