काठमाडौं । सालपा विकास बैंक लिमिटेडले सर्वसाधारणका लागि निष्कासन गरेको प्रारम्भिक सार्वजनिक निष्कासन (आईपीओ) मा आवेदन दिने आज पुस २० गते अन्तिम दिन रहेको छ। बैंकले यसअघि वैदेशिक रोजगारीमा रहेका नेपालीहरूका लागि पहिलो चरणमा आईपीओ जारी गरी बाँडफाँड सम्पन्न गरेपछि दोस्रो चरणमा सर्वसाधारणका लागि शेयर बिक्री खुला गरेको हो।
नेपाल धितोपत्र बोर्डबाट स्वीकृति पाएअनुसार बैंकले प्रतिकित्ता १०० रुपैयाँ अंकित मूल्यमा कुल १७ लाख २३ हजार ८८० कित्ता आईपीओ निष्कासन गर्ने अनुमति पाएको थियो। यसमध्ये १ लाख ७२ हजार ३८८ कित्ता शेयर वैदेशिक रोजगारीमा रहेका नेपालीहरूलाई वितरण गरिसकिएको छ।
बाँकी शेयरमध्ये ८६ हजार १९४ कित्ता सामूहिक लगानी कोषका लागि र २६ हजार ११९ कित्ता बैंकका कर्मचारीहरूका लागि सुरक्षित गरी शेष १४ लाख ३९ हजार १७९ कित्ता आईपीओ सर्वसाधारणका लागि खुला गरिएको हो।
आईपीओमा आवेदन गर्दा न्यूनतम १० कित्तादेखि अधिकतम २५ हजार कित्तासम्म माग गर्न सकिनेछ। आज बैंकिङ समयभित्र आवेदन दिन सकिनेछ भने यदि माग अनुसार आवेदन नपरेमा निष्कासन अवधि पुस ३० गतेसम्म थप गरिने बैंकले जनाएको छ।
बैंकको धितोपत्र निष्कासन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले सम्हालेको छ।
