काठमाडौं । रास्वपा सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको सहकारी ठगी सम्बन्धी मुद्दा आज पनि स्थगित भएको छ। बुटवलको सुप्रिम सहकारी संस्थाबाट रकम ठगी र सङ्गठित अपराधको अभियोगमा दुवै प्रतिवादी हाल थुनामा रहेका छन्। मुद्दा न्यायाधीश तेजनारायण पौडेल र सागर विष्टको इजलासमा परेको थियो।
अदालतका सूचना अधिकारी रामबहादुर कुँवरका अनुसार, न्यायाधीश सागर विष्टसँगको सम्बन्धित कानुन व्यवसायीको उपस्थितिका कारण सुनुवाइ स्थगित गरिएको हो।
यो मुद्दा गत कात्तिक १३ गतेदेखि निरन्तर पेसीका लागि तोकिएको भए पनि रविका कानुनी व्यवसायी र छविलाल जोशीका वकिलको निवेदनका कारण यसअघि दुईपटक सुनुवाइ स्थगित भइसकेको थियो।
न्यायाधीश द्वय मिलनकुमार राई र ओमप्रसाद अर्यालको इजलासले लामिछाने र जोशी दुवै प्रतिवादीसँग सम्बन्धित मुद्दा एकैसाथ हेर्न आदेश दिएको थियो। लामिछानेले सहकारीमा भएको अपचलनको आफ्नो भागको बिगो रकम दाखिला गरिसके पनि जिल्ला अदालत रुपन्देहीले रिहा गर्न अस्वीकार गरेपछि उनी पुर्पक्षका लागि थुनामा छन्।
बुटवल सुप्रिम सहकारी ठगीमा रविसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरेर अभियोग पत्र दायर गरिएको छ। लामिछानेले आफ्नै भागको चार भागमध्ये २ करोड ७४ लाख ८४ हजार रुपैयाँ बैंक जमानतसहित पेस गरेका थिए। जोशीले पनि बिगोको जमानत पेस गरेका थिए। तर, दुवै प्रतिवादीको भागको निश्चित रकम तय नहुनुका कारण रिहा हुन नमिल्ने आदेश जारी गरिएको हो।
हाल, लामिछाने भैरहवा कारागारबाट ललितपुरको नख्खु कारागारमा सरुवा भइसकेका छन् भने जोशी भैरहवा कारागारमै छन्।
