काठमाडौं । इजरायलमा मारिएका नेपाली युवा विपिन जोशीको पार्थिव शरीरमा प्रधानमन्त्री सुशीला कार्कीले श्रद्धाञ्जली अर्पण गरेकी छन्।
त्रिभुवन अन्तर्राष्ट्रिय विमानस्थलमा आयोजित कार्यक्रममा उनले विपिनप्रति समवेदना व्यक्त गर्दै उनका परिवारजनसहित सम्पूर्ण नेपालीलाई दुःखमा साथ दिइन्। प्रधानमन्त्री कार्कीले हमासको आक्रमणमा परेका नेपालीहरूलाई परेको पीडा र संघर्ष कल्पना गर्न नसकिने बताइन्।
उनले भनिन्, “विपिन एक नेपाली छोरा हुन्, हामी सबैको छोरा। उनको साहस र संघर्षले हामी सबैलाई गर्व छ। विपिन सधैं हाम्रो मनमा जीवित रहनेछ।”
विपिन अध्ययनको सिलसिलामा इजरायल पुगेका थिए। सन् २०२३ अक्टोबर ७ मा हमासले इजरायलको किबुत्ज क्षेत्रमा गरेको आक्रमणको क्रममा उनी बन्धक बनेका थिए। उनको अवस्था केही समयसम्म अज्ञात रह्यो। इजरायली अधिकारीहरूले गत असोज २७ गते उनकाे मृत्यु पुष्टि गरेका थिए।
इजरायल र हमासबीच भएको युद्धविराम सम्झौतापछि बन्दी साटासाटको क्रममा विपिनको शव इजरायली सेनालाई हस्तान्तरण गरिएको थियो। डीएनए परीक्षणबाट शव विपिनकै भएको पुष्टि भएको छ भने फरेन्सिक जाँचले अपहरण भएताकै समयमा मृत्यु भएको देखाएको छ।
नेपाल ल्याउनुअघि आइतबार इजरायलको तेल अवीवस्थित स्मारक र विमानस्थलमा श्रद्धाञ्जली दिइएको थियो। उनको शव आजै कञ्चनपुरस्थित घरमा पुर्याउने तयारी छ।
