काठमाडौं । नेकपा (एमाले) का महासचिव शंकर पोखरेलले पार्टीको निरन्तर प्रयासका बाबजुद षड्यन्त्रकारी शक्तिहरू मुखर रूपमा अघि आएपछि भदौ २३ र २४ गतेका घटना भएका बताएका छन्।
ललितपुरको भनिमण्डलस्थित रामबाग महलमा सुरु भएको केन्द्रीय कमिटी बैठक सञ्चालन गर्दै महासचिव पोखरेलले संकटको पहिचान त गरिएको भए पनि समयमा समाधान गर्न नसक्दा त्यसले पार्टी र देश दुवैलाई क्षति पुगेको बताए।
उनका अनुसार अघिल्लो केन्द्रीय कमिटी बैठकमा देखिएका समस्या र प्रवृत्तिहरूको निष्कर्ष निकालिए पनि तिनलाई समयमा चिर्न नसक्दा पछिल्ला घटनाहरू भएका हुन्।
“हाम्रो अघिल्लो केन्द्रीय कमिटी बैठकबाट समस्या प्रवृत्तिका रूपमा देखिएका निष्कर्षहरू निकालिएका थिए। तर, समयमा चिर्न नसक्दा २३ र २४ भदौका घटना भए र त्यसले हाम्रो पार्टी र देशलाई क्षति पुर्यायो,” उनले भने।
पोखरेलले अघिल्लो बैठकमै युवा शक्ति र भूमिहीन सुकुम्वासीहरूमा पार्टीप्रतिको आकर्षण घट्दै गएको निष्कर्ष निकालिएको स्मरण गर्दै ती क्षेत्रमा संगठन सुदृढीकरण आवश्यक रहेको पनि बताए।
