काठमाडौं । निवर्तमान प्रधानमन्त्रीलाई कारबाही गर्नुपर्ने मागमा जाहेरी परिसकेको गृहमन्त्री ओमप्रकाश अर्यालले बताएका छन्। सुदूरपश्चिमको प्रतिनिधित्वको मागसहित आमरण अनसनरत अछामका मदन बुढाको अनसन तोड्दै गृहमन्त्री अर्यालले यस्तो खुलासा गरेका हुन्।
मदन बुढाले तीनबुँदे मागसहित अनसन थालेका थिए, जसको तेस्रो बुँदामा आन्दोलनका क्रममा गोली चलाउने जिम्मेवारीमा रहेका तत्कालीन प्रधानमन्त्री, गृहमन्त्री र सिडिओलाई निष्पक्ष छानबिन गरी कारबाहीको दायरामा ल्याउनुपर्ने माग थियो। सो बुँदामा औंला देखाउँदै पढेका मन्त्री अर्यालले भने, “यो चाहिँ जाहेरी परिसकेको छ।”
उनले जाहेरीपछि केही असहज परिस्थिति सिर्जना भएको उल्लेख गर्दै भने, “त्यो असहज परिस्थिति कसले ल्यायो, सरकारले के चाहन्थ्यो — इतिहासले यसको मूल्यांकन गर्छ।”
अर्यालले न्याय माग्ने अधिकार पीडितकै हुने स्पष्ट पारे। उनका अनुसार, पीडितले चाहे जाँचुबुझ आयोगमार्फत वा प्रहरी प्रशासनमार्फत न्याय माग्न सक्छ। “पीडितले ल्याइसकेपछि कानुनसम्मत रूपमा जवाफ दिनुपर्छ,” उनले भने।
उनले पीडितको निवेदन दर्ता गर्न अस्वीकार गर्नेहरूले त्यसको कारण सार्वजनिक गर्नुपर्ने र त्यसको परिणाम पनि भोग्नुपर्ने चेतावनी दिए। “यदि कसैले न्यायको बाटो अवरुद्ध गर्छ भने त्यो व्यक्ति चिनिनुपर्छ र जिम्मेवारी लिनुपर्छ,” गृहमन्त्री अर्यालले स्पष्ट पारे।
