भक्तपुर । नेकपा (एमाले) का महासचिव शंकर पोखरेलले पार्टी पुनर्गठनको विषयलाई सडकमा उठाउन आवश्यक नरहेको बताएका छन्। बिहीबार भक्तपुरमा आयोजित पार्टीको कार्यक्रममा सम्बोधन गर्दै उनले अहिलेको समयमा पार्टीभित्र एकता र जिम्मेवारीको भावना आवश्यक रहेको बताए।
पोखरेलले भने, “अहिले पार्टीमाथि चुनौती खडा भएका बेला पुनर्गठनका नाममा नेतृत्वमाथि प्रहार गर्ने जुन प्रयास भइरहेको छ, त्यसको कुनै अर्थ छैन। पुनर्गठनको कुरा गर्ने साथीहरूलाई म भन्न चाहन्छु— त्यसको पनि बेला आउँछ।”
उनले पार्टीले विधान अधिवेशन सम्पन्न गरी अब महाधिवेशनको संघारमा पुगेको स्मरण गर्दै, जो कसैलाई आफू योग्य लाग्छ भने कार्यकर्ताको विश्वास जितेर अगाडि बढ्ने बाटो खुला रहेको बताए।
पोखरेलका शब्दमा, “हामीले विधान अधिवेशन सम्पन्न गरेका छौँ। अब महाधिवेशन नजिक छ। जसलाई लाग्छ म योग्य छु, उसले कार्यकर्ताको विश्वास जित्ने प्रणाली छँदै छ।”
उनले संकटका बेला विभाजन होइन, एकताको आवश्यकता रहेको पनि जोड दिए। “सडकमा कराएर हिँड्नुपर्ने बेला होइन। सडकमा तमासा देखाएर केही हासिल हुँदैन,” उनले भने, “आफू योग्य सावित गर्न महाधिवेशनको हलमै सबैलाई अवसर मिल्नेछ।”
महासचिव पोखरेलले पार्टीभित्र विचार, नेतृत्व र नीतिबारे छलफल लोकतान्त्रिक प्रक्रियामार्फत हुने स्पष्ट गर्दै, अहिलेको ध्यान सरकारको असफलता, जनजीविका र राष्ट्रिय स्वाभिमानका सवालमा केन्द्रित हुनुपर्ने बताए।
