काठमाडौं । नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले तोकिएको मितिमै निर्वाचन सम्पन्न गर्नुपर्ने बताएका छन्। सोमबार पार्टी कार्यालयमा बसेको सचिवालय बैठकपछि सञ्चारकर्मीसँग कुरा गर्दै उनले सबै राजनीतिक दललाई चुनावमा सहभागी गराउनुपर्नेमा जोड दिएका हुन्।
प्रचण्डले भने, “घोषित मितिमा निर्वाचन हुनुपर्छ। त्यसका लागि सक्रियताका साथ हामी लागिपरेका छौं। सबै राजनीतिक दल पनि निर्वाचनमा सहभागी हुनुपर्छ।”
उनले निर्वाचनमा सबै दलको सहभागिता सुनिश्चित गर्नका लागि आफूले राजनीतिक छलफललाई निरन्तरता दिएको जानकारी गराए। “निर्वाचनको वातावरण बनाउन अन्य राजनीतिक दलसँग छलफल भइरहेको छ। केही समयपछि त्यसको परिणाम देख्नुहुन्छ,” उनका शब्दहरू थिए।
यसैबीच, सचिवालय बैठकले हालैको अविरल वर्षा र बाढी–पहिरोले देशभर पुर्याएको क्षतिप्रति दुःख व्यक्त गर्दै प्रभावित क्षेत्रमा तत्काल राहत पु¥याउन सरकारलाई आग्रह गरेको छ। बैठकमा पार्टी प्रवक्ता अग्नि सापकोटाले विचार मिल्ने दलहरूसँग एकता प्रक्रिया पनि अघि बढाइने निर्णय भएको जानकारी दिएका छन्।
माओवादी केन्द्रले आसन्न निर्वाचनलाई प्राथमिक एजेन्डा बनाउँदै आवश्यक तयारी तीव्र पार्ने र राष्ट्रिय एकताको वातावरण बनाउने निर्णय गरेको सचिवालय बैठकले स्पष्ट पारेको छ।
