काठमाडौं । नेपाली कांग्रेसका उपसभापति तथा पूर्व उपप्रधानमन्त्री पूर्णबहादुर खड्काले नेपालको इतिहासमा पहिलो पटक राज्यका सम्पूर्ण संरचनामाथि आक्रमण भएको बताएका छन्।
गत भदौ २३ र २४ गते देशभर जेनजी आन्दोलनका नाममा भएका आगजनी र तोडफोडपछि पहिलो पटक गृहजिल्ला सुर्खेत पुगेका खड्काले यस्तो धारणा सार्वजनिक गरेका हुन्।
सुर्खेतस्थित पार्टी कार्यालयको अनुगमनपछि पत्रकार सम्मेलनमा बोल्दै उनले भने, “नेपाल राज्यको इतिहासमा सम्पूर्ण संरचनामाथि यस्तो अमानवीय र बर्बरपूर्ण आक्रमण पहिलो पटक भएको हो। नेपाल देश अस्तित्वमा आएदेखि अहिलेसम्म सिंगो राज्य संरचना यसरी आक्रमणमा परेको देखिएको छैन।”
खड्काले जेनजी आन्दोलनका क्रममा भएका भौतिक क्षतिको निन्दा गर्दै ज्यान गुमाएकाप्रति श्रद्धाञ्जली अर्पण गरे। उनले भने, “जेनजी पुस्ताका भाईबहिनीहरुले यस्तो अवस्था सिर्जना गर्नका लागि आन्दोलन गरेको होइन भन्ने मलाई विश्वास छ। तर ठूलो षड्यन्त्रकारीको हिंसात्मक गतिविधिले निर्दोषले ज्यान गुमाएका छन्, तीप्रति गहिरो श्रद्धाञ्जली व्यक्त गर्दछु।”
