काठमाडौं । नेपाल कम्युनिष्ट पार्टी (एमाले)को दोस्रो विधान महाधिवेशन ललितपुरको गोदावरीस्थित सनराइज सम्मेलन केन्द्रमा तीन दिनसम्म सञ्चालन गरी सम्पन्न भएको छ । महाधिवेशनले अध्यक्ष केपी शर्मा ओलीद्वारा प्रस्तुत राजनीतिक प्रतिवेदन, उपाध्यक्ष विष्णुप्रसाद पौडेलद्वारा प्रस्तुत विधान संशोधन प्रस्ताव र महासचिव शङ्कर पोखरेलद्वारा प्रस्तुत संगठनात्मक प्रतिवेदन सर्वसम्मत पारित गरेको छ ।
यसैगरी, केन्द्रीय सल्लाहकार परिषद्, केन्द्रीय अनुशासन आयोग, केन्द्रीय लेखा आयोग र केन्द्रीय निर्वाचन आयोगका अध्यक्षहरूले प्रस्तुत गरेका प्रतिवेदनहरू पनि सर्वसम्मत पारित भएका छन् । महाधिवेशनमा छलफलका लागि दश समूह बनाएर सुझाव संकलन गरिएको थियो ।
समूहगत छलफलपछि अध्यक्ष ओलीले ‘जनताको बहुदलीय जनवाद (जबज)’लाई पार्टीको मार्गदर्शक सिद्धान्तका रूपमा अघि बढाउने स्पष्ट गर्दै बिग्रेका मानिसहरूसँग एकता खोज्नु आवश्यक नरहेको बताए । उनले पार्टीलाई मिसन २०८४ अन्तर्गत बहुमत सरकार गठनतर्फ अघि बढाउने विश्वास व्यक्त गरे ।
उपाध्यक्ष पौडेलले जबजबाट एमाले ‘डिरेल’ भएको भन्ने प्रचारप्रति आपत्ति जनाउँदै नेपालको मौलिकता र विशेषतामा आधारित समाजवादलाई पार्टीले अंगिकार गर्ने बताए । उनले अध्यक्ष ओलीकै नेतृत्वमा बहुमतको सरकार गठन गर्नुपर्ने धारणा प्रस्तुत गरे ।
महासचिव पोखरेलले संगठनात्मक प्रतिवेदनमा आएका सुझावलाई आत्मसात गर्दै पार्टीलाई लोकतान्त्रिकरण र सबलीकरणतर्फ अघि बढाउने बताए । उनले मिसन २०८४ लाई पार्टी निर्माणको केन्द्रबिन्दु बनाइने स्पष्ट पारे ।
भदौ २० देखि २२ गतेसम्म चलेको महाधिवेशनमा दुई हजार ३४१ प्रतिनिधि र आयोजक सहभागी थिए । यसअघि एमालेले २०७८ असोजमा सोही स्थानमा पहिलो विधान महाधिवेशन सम्पन्न गरेको थियो । विधानअनुसार दुई राष्ट्रिय महाधिवेशनबीच विधान महाधिवेशन गर्ने व्यवस्था छ ।
