काठमाडौं । शेयर बजारमा आज गिरावट आएको छ। कारोबार हुने साताको पहिलो दिन आइतबार नेप्से परिसूचक ११.५२ अंकले घटेर २,७०८.२५ विन्दुमा झरेको छ। यो लगातार चौथो दिनको गिरावट हो। सेन्सेटिभ इन्डेक्स २.३२ अंक, फ्लोट इन्डेक्स ०.७७ अंक र सेन्सेटिभ फ्लोट इन्डेक्स ०.६६ अंकले घटेपछि समग्र नेप्से प्रभावित भएको छ।
आज ३३४ स्टकको ५८ हजार ८७ पटकको कारोबारमा १ करोड ११ लाख २४ हजार कित्ता शेयर खरिदबिक्री हुँदा कुल कारोबार रकम ४ अर्ब ४० करोड २७ लाख रुपैयाँ पुगेको छ। गत बिहीबार कारोबार रकम ५ अर्ब १४ करोड रुपैयाँ रहेको थियो।
आज युनियन हाइड्रोपावर कम्पनी सबैभन्दा बढी कारोबारमा शीर्ष स्थानमा रह्यो, जसको शेयर कारोबार रकम २९ करोड ९९ लाख रुपैयाँ भएको छ। त्यस्तै, नेपाल पुनर्बीमा कम्पनीको करिब २७ करोड र एभरेष्ट बैंकको २२ करोड रुपैयाँबराबरको कारोबार भयो।
लगानीकर्ताले सबैभन्दा धेरै लाभ हिम स्टार उर्जामा पाएका छन्, जसको शेयर मूल्य ९.९७ प्रतिशत (३५.५० रुपैयाँ) वृद्धि भएको छ। एनआईबिएल समृद्धि फण्ड २ का इकाईधनीले ५.८३ प्रतिशत र युनिभर्सल पावर कम्पनीका लगानीकर्ताले ५.१२ प्रतिशत कमाएका छन्। आज सबैभन्दा बढी घाटा पञ्चकन्या माई हाइड्रोपावरमा भएको छ, जहाँ शेयर मूल्य ४.६२ प्रतिशतले घटेको छ।
१३ उपसमूहमध्ये आज ३ उपसमूहको परिसूचक बढ्दा १० उपसमूहको परिसूचक घटेको छ। वित्त, उत्पादन तथा प्रशोधन र म्युचुअल फण्ड उपसमूहमा सामान्य वृद्धि भए पनि जलविद्युत उपसमूह ०.६८ प्रतिशत र बैंकिङ्ग उपसमूह ०.६५ प्रतिशतले घटेको छ।
