काठमाडौं । संघीय मामिला तथा सामान्य प्रशासन मन्त्री भगवती न्यौपानेले देशभरिका सबै गाउँपालिका र नगरपालिकामा निमित्त पदको अन्त्य गर्दै स्थायी प्रमुख प्रशासकीय अधिकृतको जिम्मेवारी तोकिएको बताएकी छन् ।
मन्त्री न्यौपानेका अनुसार देशका ७५३ स्थानीय तहमध्ये करिब २०० पालिका हालसम्म निमित्त प्रमुखको भरमा सञ्चालित थिए । “देश र जनतालाई केन्द्रमा राखेर मैले यो निर्णय गर्नैपर्ने थियो,” उनले सामाजिक सञ्जालमा पोष्ट गर्दै भनेकी छन् ।
उनले जिम्मेवारी पाएका कर्मचारीहरुलाई उच्च दक्षता र इमानदारीसाथ काम गर्न आग्रह गर्दै, पालिका प्रमुख तथा जनप्रतिनिधिहरूलाई नयाँ प्रमुख प्रशासकीय अधिकृतको क्षमताको सदुपयोग गर्न र स्वागत गर्न आग्रह गरेकी छन्।
साथै, मन्त्री न्यौपानेले आगामी दिनमा उपमहानगर तथा महानगरपालिकामा पनि निमित्त पदको अन्त्य गर्ने योजना रहेको जानकारी दिएकी छन्। यस निर्णयलाई आम जनताको हितमा लिइएको र यसमा सबैको सहयोग र सुझाव अपेक्षित रहेको उनको भनाइ छ ।
मन्त्रालयले लामो समयदेखि निमित्त प्रमुख प्रशासकीय अधिकृतको भरमा सञ्चालन हुँदै आइरहेका झण्डै २ सय स्थानीय तहमा दरबन्दीअनुसारकै प्रमुख प्रशासकीय अधिकृत पठाउने गरी अन्तिम सूची तयार गरेको थियो ।
शक्ति, पहुँच र कहीँकहीँ पैसासमेत प्रयोग गरी लामो समयदेखि निमित्त प्रमुख प्रशासकीय अधिकृत रहँदै आएका झण्डै २ सय कर्मचारीलाई सो जिम्मेवारीबाट मुक्त गरी नियमअनुसारका अधिकारप्राप्त प्रमुख प्रशासकीय अधिकृत पठाउने गरी मन्त्रालयले उक्त सूची तयार गरेको थियो ।
संघीय मामिला तथा सामान्य प्रशासन मन्त्री भगवती न्यौपानेले विभिन्न महत्वपूर्ण नीतिगत सुधारका कार्यहरू थाल्दै देशभरका ७ सय ५३ वटै स्थानीय तहमा दरबन्दीअनुसारकै प्रमुुख प्रशासकीय अधिकृत राख्ने र निमित्त प्रथा सदाका लागि अन्त्य गर्ने प्रतिवद्धता जनाउँदै आएकी छन् । मन्त्री न्यौपानेको सो प्रतिबद्धताअनुसार मन्त्रालयले निमित्त प्रमुख प्रशासकीय अधिकृत रहने रोगलाई सदाका लागि अन्त्य गरेको हो ।
स्थानीय तहमा निमित्तको भरमा प्रशासन सञ्चालन गर्दा ऐन कानुन मिचिनुका साथै विभिन्नखाले विकृति आएको, चेन अफ कमान्ड टुट्ने गरेको, सन्तुलन नमिलेको, काम लगाउने र गर्ने दुवैले हचुवामा काम गर्दा परिणाम आउन नसकी सेवा प्रवाह प्रभावकारी हुन नसकेको निष्कर्षका साथ मन्त्रालयले स्थानीय तहमा निमित्तको रोग उन्मूलन गर्ने गृहकार्य अन्तिम चरणमा पु¥याएको बताएकी छन् ।
