काठमाडौं । पर्यटकिय क्षेत्रमा नयाँ अवसर सिर्जना गर्ने उद्देश्यसहित बन्दीपुर केबुलकार एण्ड टुरिजम लिमिटेडको आईपीओ आजदेखि आम सर्वसाधारणका लागि खुलेको छ।
कम्पनीको जारी पूँजी २ अर्ब ८३ करोड रुपैयाँ रहेको छ। यसको २०.७० प्रतिशत सेयर अर्थात ५८ लाख ६० हजार कित्ता सर्वसाधारण समूहका लागि छुट्याइएको छ। आयोजनाप्रभावित व्यक्ति, वैदेशिक रोजगारीमा रहेका नागरिक, कम्पनीका कर्मचारी तथा सामूहिक लगानी कोषलाई छुट्याएपछि बाँकी ४३ लाख ४१ हजार ८० कित्ता सेयर सर्वसाधारणका लागि खुला गरिएको हो।
सेयरमा आवेदन भदौ १५ गतेसम्म दिन सकिने व्यवस्था गरिएको छ। न्यूनतम १० तथा अधिकतम २० हजार कित्तासम्म आवेदन दिन सकिने कम्पनीले जनाएको छ। आवेदन मेरोसेयर अनलाइन प्रणाली वा आफ्नो खाता रहेको सीआस्बा सदस्य बैंक तथा वित्तीय संस्थामार्फत गर्न सकिनेछ।
कम्पनीको व्यवसाय र भविष्य योजना
कम्पनीको मुख्य व्यवसाय केबुलकार तथा होटल सेवा हो। बन्दीपुरको केबुलकार गत वर्ष जेठ ३१ गतेबाट व्यावसायिक रुपमा सञ्चालनमा आएको छ भने होटल क्विन टावर आगामी मंसिरदेखि सञ्चालनमा आउने अनुमान गरिएको छ।
कम्पनीले केबुलकार र होटलसँगै ड्राइभइन रेष्टुरेन्ट, मनोरञ्जनात्मक बगैंचा, जीप लाइन, स्काई साइक्लिङ्ग जस्ता गतिविधि सञ्चालनमा ल्याएको छ। साथै, स्काईवाक, बन्जीजम्प, स्विङ्ग र अन्य मनोरञ्जनात्मक पूर्वाधार निर्माण गरी व्यवसायिक पर्यटकीय गतिविधि विस्तार गर्ने योजना बनाइएको छ।
कम्पनीको रजिष्टर्ड कार्यालय काठमाडौं, कालीमाटीमा रहेको छ। केयर रेटिङ नेपालले कम्पनीलाई बीबी रेटिङ प्रदान गरेको छ, जसले दायित्व वहनमा मध्यमस्तरको संकेत गर्दछ।
आर्थिक अवस्था र प्रक्षेपण
कम्पनीको केबुलकार आयोजनाको कुल लागत ३ अर्ब ८५ करोड रुपैयाँ रहेको छ। गत चैत मसान्तसम्म कम्पनीको प्रतिसेयर नेटवर्थ ९२ रुपैयाँ ४१ पैसा थियो भने प्रतिसेयर आम्दानी २.८४ रुपैयाँ ऋणात्मक रहेको थियो। सञ्चित नोक्सानी करिब १० करोड ६ लाख रुपैयाँ रहेको छ।
कम्पनीले आगामी आर्थिक वर्ष २०८२/८३ मा प्रतिसेयर आम्दानी ७.२४ रुपैयाँ र प्रतिसेयर नेटवर्थ १०१ रुपैयाँ हुने प्रक्षेपण गरेको छ। साधारण लगानी फिर्ता अवधि अनुमान ८.२२ वर्ष रहेको कम्पनीले जनाएको छ।
लगानीकर्ताका लागि अवसर
बन्दीपुर केबुलकार एण्ड टुरिजम लिमिटेडको आईपीओले साधारण लगानीकर्तालाई पर्यटन क्षेत्रको विकासमा सहभागी हुने मौका दिएको छ। कम्पनीले सञ्चालन गर्दै आएको मनोरञ्जनात्मक गतिविधि र आगामी पूर्वाधारले पर्यटक आकर्षण बढाउने अपेक्षा गरिएको छ।
नेपालको पर्यटन क्षेत्रमा स्थायित्व र लाभ सुनिश्चित गर्न कम्पनीले दीर्घकालीन योजना बनाएको र केबुलकार तथा होटल सञ्चालन मार्फत आम्दानी वृद्धि गर्ने लक्ष्य लिएको छ।
