काठमाडौं । नेपालमा मनसुनको न्यून चापीय रेखा सरदर स्थानको दक्षिणतर्फ रहेकाले हाल मनसुन केही कमजोर अवस्थामा रहेको छ। यद्यपि बंगालको खाडीबाट जलवाष्पयुक्त हावा भित्रिरहेकाले देशका विभिन्न स्थानमा हल्का वर्षा भइरहेको छ।
कोशी, बागमती, गण्डकी, लुम्बिनी लगायतका प्रदेशका पहाडी भूभागमा सामान्य बदली रहेको छ भने बाँकी क्षेत्रमा आंशिक बदली देखिएको छ। गण्डकी र सुदूरपश्चिम प्रदेशका पहाडी जिल्लाका केही ठाउँमा तथा लुम्बिनी र कर्णाली प्रदेशका एक–दुई स्थानमा हल्का वर्षा भएको छ।
बाढी पूर्वानुमान महाशाखाका अनुसार बुधबार बिहानको मापनमा कोशी, नारायणी, बागमती, कर्णाली, महाकाली लगायतका मुख्य नदीहरू र सहायक नदीहरूको बहाव सतर्कता तहभन्दा तल नै रहेको छ।
तर, ताप्लेजुङ, सङ्खुवासभा, दोलखा, सिन्धुपाल्चोक, दार्चुला लगायतका जिल्लामा बहने स–साना नदीहरूको बहाव उल्लेख्य बढ्ने र आकस्मिक बाढी आउने मध्यम जोखिम रहने अनुमान गरिएको छ।
त्यस्तै, इलाम, झापा, मोरङ, उदयपुर, सोलुखुम्बु, रसुवा, धादिङ, रामेछाप, काभ्रेपलान्चोक, काठमाडौं, ललितपुर, भक्तपुर, लमजुङ, तनहुँ, गोरखा, जाजरकोट, रुकुम पश्चिम, दैलेख, कालिकोट, सल्यान, सुर्खेत, हुम्ला, डोल्पा, कैलाली, कञ्चनपुर लगायतका जिल्लामा पनि केही साना नदीहरूको बहाव बढ्ने र आकस्मिक बाढी आउने मध्यम सम्भावना रहेको छ।
महाशाखाले स्थानीयवासीलाई सतर्क रहन आग्रह गरेको छ।
