काठमाडौं । पूर्वराष्ट्रपति विद्यादेवी भण्डारीको विराटनगर भेटघाट कार्यक्रममा नजान एमाले विराटनगर कमिटीले सूचना जारी गरेको छ।
नगर इन्चार्ज पर्शुराम बस्नेतले सामाजिक सञ्जालमार्फत पार्टी कार्यालयमा एमालेको कुनै पनि आधिकारिक कार्यक्रम नभएकाले सहभागी नहुन अनुरोध गरेका हुन्। उनले फेसबुकमा लेखेका छन्, “एमालेको केन्द्र, प्रदेश वा जिल्ला तहबाट कुनै पनि कार्यक्रम निर्धारण गरिएको छैन।”
पूर्वराष्ट्रपति भण्डारी सोमबार विराटनगर पुगेकी थिइन्। स्थानीय उद्घोष पत्रिकाको वार्षिकोत्सव कार्यक्रममा सहभागी हुन गएकी भण्डारीले एमाले पार्टी कार्यालयमा कार्यकर्तासँग भेटघाट गर्ने भनेर सार्वजनिक भएको सूचना गलत भएको भन्दै बस्नेतले सामाजिक सञ्जालमार्फत स्पष्टिकरण दिएका हुन्।
भण्डारीनिकट विनोद ढकाल विराटनगर निवासी हुन्। विराटनगर महानगर कमिटी र मोरङ जिल्ला कमिटीमा उनको वर्चस्व रहेको छ। तर, प्रदेश कमिटी अध्यक्षमा भने उनी घनश्याम खतिवडासँग पराजित भएका थिए। यसअघि पनि भण्डारीको कोशी भ्रमण ढकालले नै मिलाएका थिए।
६ साउनमा एमालेले भण्डारीलाई पार्टी सदस्यता नदिने निर्णय गरेपछि कार्यकर्ताबीच पक्ष–विपक्षको विभाजन देखिएको छ। सोमबार पनि विराटनगरमा एमालेका प्रदेश सांसददेखि प्रभावशाली नेता–कार्यकर्ताहरू विमानस्थलमै पुगेर भण्डारीलाई स्वागत गरेका थिए।
