काठमाडौं । गृहमन्त्री रमेश लेखकले नेपालको संविधानले दोहोरो नागरिकताको व्यवस्था नगरेको स्पष्ट पारेका छन्। विधायन व्यवस्थापन समितिको बैठकमा बोल्दै उनले भने, “कुनै नेपाली नागरिकले विदेशको नागरिकता लिएको खण्डमा नेपालको नागरिकता स्वतः समाप्त हुन्छ। यदि पुनः नेपालमा नागरिकता लिन चाहन्छ भने सम्बन्धित देशको नागरिकता छोडेको प्रमाण दर्ता गराएपछि मात्र नागरिकता कायम हुनेछ।”
उनले दुवै देशको नागरिकता राख्ने व्यवस्था गर्न संविधान संशोधन आवश्यक पर्ने पनि बताए। गृहमन्त्री लेखकले आमाको नामबाट नागरिकता पाउन प्रक्रियालाई सरल बनाउने उद्देश्य रहेको बताए। नेपाल नागरिकता (दोस्रो संशोधन) विधेयक, २०८१ माथि दफावार छलफलको क्रममा उनले विधेयकको उद्देश्य स्पष्ट गर्दै भने, “आमाले घोषणा गरेर ‘मेरो सन्तान हो’ भनेको खण्डमा नागरिकता दिनुपर्छ। यसमा स्वघोषणा प्रणाली राखेर प्रक्रिया सहज बनाउने प्रयास हो।”
उनले सांसदहरुलाई आमाको नामबाट नागरिकता दिने प्रक्रियामा अनुमान नभएका वा प्रतिनिधि सभाबाट सम्भावित बहसका खण्डहरू समावेश गर्न आग्रह गरेका छन्।
