काठमाडौं । राष्ट्रिय स्वतन्त्र पार्टीका कार्यवाहक सभापति डोलप्रसाद अर्यालले नीति नियमहरू आधुनिक पुस्तालाई लक्षित गरेर बनाउनुपर्ने बताएका छन्। मंगलबार ललितपुरमा पार्टीको युवा विभागले आयोजना गरेको कार्यक्रममा उनले अब बन्ने नीतिहरू अघिल्लो पुस्ताका लागि नभई आधुनिक पुस्ताका लागि हुनुपर्ने बताए।
अर्यालले संघीयता र संविधानको कार्यान्वयनका लागि आगामी पुस्तालाई ध्यानमा राखेर दीर्घकालीन बौद्धिक नक्शा बनाउनुपर्ने बताए। राजनीतिक क्षेत्रमा पनि अब युवा पुस्ता अपरिहार्य भएको उल्लेख गर्दै उनले रास्वपा संसदमा प्रवेश गरेपछि सदन सुन्न र हेर्न लायक बनेको बताए।
उनले भने, “हामीले देश निर्माणको लागि ५० वर्षको नक्शा बनाउनुपर्छ जसमा युवापुस्ता समेटिन सकून्। राजनीतिक वृत्तमा युवा पुस्ता अपरिहार्य भएको देखिएका छन्।”
कार्यवाहक सभापति अर्यालले राजनीतिमा लाग्न चाहनेहरूले आफ्ना सोच र दृष्टिकोण स्पष्ट भएपछि मात्रै रास्वपामा प्रवेश गर्न आग्रह समेत गरे।
