काठमाडौं । किसानको उत्पादनको बजार प्रवर्द्धन गर्दै आएको मेरो किसान लिमिटेडले चितवनको भरतपुर महानगरपालिका–२२, पटिहानीमा ४० करोड रुपैयाँ लगानीमा अत्याधुनिक कृषि प्रशोधन उद्योग र कोल्ड स्टोर निर्माण सुरु गरेको छ।
कम्पनीका प्रबन्ध निर्देशक अविनाश सिलवालका अनुसार उद्योगमा तोरी, टमाटर केचप, बेसार, अदुवाको सुठो, अलैँची, कोदो, फापर, मह, कफी लगायतका कृषिजन्य वस्तु प्रशोधन गरिनेछ। कच्चा पदार्थ चितवनका किसानसहित देशभरका स्थानीय उत्पादकबाट संकलन गरिने योजना छ।
प्रशोधन गरिएका वस्तु देशभर वितरण गर्ने र अन्तर्राष्ट्रिय बजारमा निर्यात गर्ने लक्ष्य कम्पनीले लिएको छ। साथै, अत्याधुनिक कोल्ड स्टोरमार्फत तरकारी तथा फलफूल दीर्घकालीन संरक्षण गरी काठमाडौं, पोखरा लगायतका प्रमुख सहर तथा विदेशमा आपूर्ति गर्ने योजना छ।
कोरोना महामारीको समयमा स्थापना भएको मेरो किसान लिमिटेडले छोटो अवधिमै मोबाइल एपमार्फत ४० हजारभन्दा बढी उपभोक्ता र ३ सयभन्दा बढी व्यवसायिक हाउससँग प्रत्यक्ष काम गरिरहेको छ। देशभरका ५ सयभन्दा बढी व्यावसायिक कृषकसँग दीर्घकालीन सम्झौता गर्दै कम्पनी उत्पादन, संकलन, प्रशोधन र वितरणको सम्पूर्ण चक्रमा संलग्न छ।
‘बीउदेखि बजारसम्म’को प्रतिबद्धता जनाउँदै कम्पनीले यस परियोजनामार्फत किसानको आम्दानी वृद्धि, कृषि उत्पादनको मूल्य अभिवृद्धि, खाद्य सुरक्षा मजबुत बनाउने र नेपालको कृषि निर्यात क्षमतामा योगदान पुर्याउने लक्ष्य राखेको छ।
