काठमाडौं । पूर्वराष्ट्रपति विद्यादेवी भण्डारीकी जेठी छोरी उषाकिरण भण्डारीले एमालेको परराष्ट्र मामिला विभाग सदस्यबाट राजीनामा दिएकी छन्।
पूर्वराष्ट्रपति भण्डारीको पार्टी सदस्यता नवीकरण नगर्ने एमालेको निर्णयपछि असन्तुष्ट रहँदै आएकी उषाकिरणले तीन दिनअघि नै विभाग सदस्य पदबाट राजीनामा दिए पनि यसबारे सार्वजनिक रूपमा केही भनिएकी थिइनन्। हाल एमालेले परराष्ट्र मामिला विभागको प्रमुखको जिम्मेवारी सचिव रघुवीर महासेठलाई दिएको छ।
मदन भण्डारीकी जेठी छोरी र मदन भण्डारी फाउन्डेसनकी अध्यक्षसमेत रहेकी उषाकिरणले यसअघि सामाजिक सञ्जालमार्फत एमालेको निर्णयप्रति असन्तुष्टि जनाएकी थिइन्। गत साउन ८ मा उनले पूर्वराष्ट्रपति भण्डारीलाई राजनीतिमा आउन रोक लगाउने निर्णयप्रति आफू अचम्मित नभएको बताउँदै आलोचनात्मक टिप्पणी गरेकी थिइन्।
उनले सो पोस्टमार्फत विगतमा पार्टीप्रति नैतिक समर्थनको आग्रह भए पनि हाल त्यसको आवश्यकता र चाहना दुवै नरहेको बुझ्न पाएको उल्लेख गरेकी थिइन्।
