काठमाडौं । रोजगारीका लागि दक्षिण कोरिया जान चाहने नेपाली युवाहरूका लागि कोरियन भाषा परीक्षाको आवेदन आजदेखि खुला भएको छ। श्रम, रोजगार तथा सामाजिक सुरक्षा मन्त्रालयअन्तर्गतको ईपीएस कोरिया शाखाले सोमबार सूचना जारी गर्दै कोरियन भाषा परीक्षाका लागि आवेदन माग गरेको हो। आवेदन दिने समय साउन २५ गतेदेखि २८ गतेसम्म रहेको छ।
यसपटक अनुमानित ५ हजार ३ सय जना नेपाली श्रमिक छानिने अनुमान गरिएको छ। तीमध्ये ३ हजार ५ सय जना उत्पादनमूलक क्षेत्रतर्फ र १ हजार ८ सय जना कृषि तथा पशुपालन क्षेत्रतर्फ छनोट हुनेछन्। माग अनुसार यो संख्या बढघट हुन सक्ने शाखाले जनाएको छ।
आवेदन दिने व्यक्तिको उमेर १८ वर्ष पूरा भई ३९ वर्ष ननाघेको हुनुपर्छ। इच्छुक उम्मेदवारले ईपीएस नेपालको वेबसाइटमार्फत अनलाइन आवेदन दिनुपर्नेछ। आवेदन दिँदा राहदानीको फोटो, इमेल ठेगाना र फोन नम्बर अनिवार्य रूपमा उल्लेख गर्नुपर्नेछ।
परीक्षा शुल्क २८ अमेरिकी डलर (करीब ३ हजार ८ सय ६६ रुपैयाँ) रहेको छ। परीक्षा काठमाडौँस्थित केन्द्रहरूमा युबिक्युटस बेस्ड टेस्ट (UBT) प्रणालीमार्फत अनलाइन सञ्चालन हुनेछ। परीक्षाको मिति पछि सार्वजनिक गरिनेछ।
भाषा परीक्षा ५० मिनेटको हुनेछ। जसमा २५–२५ मिनेटका दुई भागमा पढाइ र सुनाइ सम्बन्धी गरी ४० प्रश्न हुनेछन्। परीक्षामा पास भएपछि दोस्रो चरणको सीप परीक्षणमा सहभागी हुन पाइनेछ। भाषा परीक्षाको नतिजा प्रकाशित भएको मितिले दुई वर्षसम्म मान्य हुनेछ।
ईपीएस शाखाले आवेदन भर्दा गल्ती नगर्न र एक व्यक्तिले केवल एक क्षेत्र रोज्नुपर्ने जानकारी दिएको छ। साथै नक्कल गर्ने वा गराउने प्रमाणित भएमा चार वर्षसम्म पुनः परीक्षा दिन नपाइनेछ।
परीक्षामा सहभागी हुँदा सक्कल राहदानी र प्रवेश पत्र अनिवार्य रूपमा लिएर जानुपर्नेछ।
